Fundacion C.V.A. Aruba a habri aña positivo

Dia 19 di februari Fundacion CVA Aruba a ricibi un donacion di Afl. 1.500,00 di Aruba Lions Club. E Presidente di Aruba Lions, Sr. Randolf Vrolijk a haci entrega di e cheque na Presidente di Fundacion CVA Aruba Sra. Hellen Mohamed, den presencia di demas miembro di Directiva di Fundacion CVA Aruba. Sra. Mohamed a remarka di ta sumamente contento cu e donacion aki cu lo contribui na print foyeto y otro material di informacion pa cu Stroke.

Tambe Fundacion CVA Aruba a tene dia 23 di februari un charla na Juana Morto tocante e enfermedad cerebro-vascular, esta CVA/Stroke, cu ta afecta un gran cantidad di tanto hende muher como hende homber di tur edad. Durante e charla, cu a wordo duna riba peticion di Fundacion Vision Nobo,  Sra. Tida Peterson di Fundacion CVA a splica un cantidad grandi di habitante di Juana Morto y vecindario kiko ta un stroke y cualnan ta e factornan cu ta contribui na esaki. Esnan presente a haña informacion tocante e importancia di tene preshon bou control, di check nan cholesterol regularmente y di haci ehercicio y come saludable.

Cu tipo di charlanan asina den diferente bario, Fundacion CVA ta trata na concientisa mas tanto hende posible riba con pa preveni un atake cerebral y con pa actua si bo ta mira e simptomanan di un stroke cerca bo mes o cerca un otro persona. Tambe Fundacion CVA ta duna informacion riba e concequencianan di un stroke tanto pa esun cu a sufri un stroke como tambe pa su famia. Un stroke ta cambia bida di esun cu a sufri’e pa semper y ta pesei mes Fundacion CVA lo sigui traha pa concientisa mas tanto persona, specialmente esnan hoben, riba e importancia di cuida nan salud y haci ehercicio. No tin cura pa stroke, pesei mes prevencion ta asina importante.

Den e luna cu ta bin Fundacion CVA lo tene otro charla na EPI y tambe lo tene, cu colaboracion di Aruba Doet, AMA y Estrella Youth Basketball, un Mainta pa Salud na Club Estrella na Santa Cruz. Esaki lo tuma lugar dia 16 di maart 2013.