For di aña pasa un grupo di boluntario di FBNDD, cu normalmente ta custumbra di bishita casnan di famia y lesa storia pa e yiunan chikito na cas, a hiba e proyecto di lesamento aki den un dimension nobo, mas bibo y actualmente hopi gusta. A cuminsa cu e proyecto di Tanto Cuenta presentando storianan dramatisa den varios bario di Aruba.
Transmiti cuenta oral di adulto pa mucha ta un forma tradicional den hopi cultura. Den nos cultura nos ta custumbra cu contamento di storia oral for di tempo di nos wela y bisawela. Storianan di spirito, di alma malo pero tambe di kabouter y gigante semper a capta atencion di grandi y chikito. Hopi storia di antes ainda ta bibo den nos memoria; nan durabilidad atraves di tempo cerca cada un di nos ta constata e importancia di nan contenido, mescos cu nan poder di a deleita nos, desaroyando creatividad, fantasia y siña nos moralnan di bida.
Cuenta di hada ta un bunita forma di duna e muchanan e oportunidad di conoce y saborea tur e personahenan di cua nan welo y mayornan a crece cu nan. Cuenta di hada den forma actua ta laga e muchanan biba cu tur e personahenan cu nan conoce atraves di storia conta.
Diasabra , 20 di November, un biaha mas publico di Aruba por a gosa di un anochi spectacular yena cu fantasia, magia y hopi color. EPI tabata e cuna di presentacion di tres cuenta di hada treci dilanti pa un elenco forma di boluntarionan di Bon Nochi Drumi Dushi. Desiree Correa, cu tambe ta forma parti di Tanto Cuenta, ta e traductor di e storianan di hada y fuera di traha e guion pa e elenco, e ta supervisa y conseha tur ensayo. E storianan cu a presenta ta cuentanan reconoci mundialmente, pero tambe gusta pa e publico di Aruba. E publico presente diadomingo 20 di november, a gosa masha hopi y por spera cu den futuro cercano Tanto Cuenta lo amplia su repertorio di cuenta di hada cu storianan nobo. Den luna di Maart 2017 Tanto Cuenta lo start su biahe rond di Aruba bon ekipa cu cuentanan nobo y gusta pa chikito y grandi.
Finalmente Fundacion Bon Nochi Drumi Dushi kier gradici cada persona cu durante aña 2016 a colabora di un of otro forma cu nan; e boluntarionan cu contamento di storia na cas, e elenco di Tanto Cuenta cu presentacion den e barionan, sponsornan, tur esnan cu a colaborado cu e actividadnan organisa durante aña, medionan di prensa, mayor, muchanan y henter pueblo di Aruba, cu a sostene Fundacion Bon Nochi Drumi Dushi den su empeño pa stimula e placer di lesamento den nos comunidad.
Pa medio di e articulo aki tambe, FBNDD kier manda su mas grandi deseo pa tur famia aki na Aruba; cu e dianan di fiesta por ta yena cu pas, harmonia, salud y felicidad den cada hogar. Cu cada un di nos por disfruta y comparti den famia e momentonan di trankilidad den harmonia di un buki, pa asina aleha nos di tur cos negativo y habitual y conecta nos cu e mundo magico di lesamento.