Fundacion Anti Droga Arubano, FADA, a lansa un campaña yama Amigo DIDI. Señora Michela Croes a splica cu e idea ta pa bin cu un campaña di 1 aña largo, cuminsando aworaki cu ta temporada di Carnaval, hunto cu su jingle. Amigo DIDI ta pa conscientisa e pueblo cu si bo ta bayendo carnaval, pa hiba un amigo cu bo, cu no ta bebe, pa asina sigura cu bo ta yega bo cas bon bek. Despues di Carnaval ta sigui pa temporada di campamento.
Asina lo sigui cu cada temporada. Despues di un aña lo evalua resultadonan di e campaña, pa asina wak con e proyecto a bay, aunke no ta kere cu lo tarda un aña so pero mas di esey. Ta stens hopi riba sosten financiero di comerciantenan.
Un campaña ta algo ta costoso, y aworaki FADA tin un budget, como tambe Fundacion Zinnia. Esaki ta posibel door di donacionnan ricibi y tambe door di actividadnan cu a organisa. Y ta danki na e placa di e fondo aki ta esun cu ta wordo uza pa tur e trabaonan aki.