Recientemente a tuma lugar na Zoetermeer e seminario “Colombia in the Spotlight”organisa door di evofenedex, conhuntamente cu embahada di Colombia na Hulanda, embahada di Hulanda na Colombia, ProColombia y Holland House na Colombia. E programa a enfoca riba e sectornan di transporte, logistica, maritimo y agro-food y a conta cu participacion di mas cu 60 representante di companianan y instancianan Hulandes cu ta haci negoshi cu Colombia of cu ta interesa den esaki.
Durante e seminario tabata tin varios presentacion, entre otro di Procolombia, Holland House, Business Bridge, RVO, STC-Group, Ministerio di Asuntonan Economico di Hulanda, Meijer Advocaten y tambe di expertonan Hulandes cu tin hopi aña ta haci negoshi na Colombia. E embahador Hulandes suplente a yama for di Bogota via Skype pa duna su presentacion y a menciona cu paisnan di Reino Hulandes ta cerca di Colombia, y cu na Aruba tin hopi Colombiano ta biba, cual ta haci cu tin un contacto estrecho entre cuidadanonan di Aruba y Colombia. Tambe el a menciona cu for di e islanan den reino tin un mercado importante pa Colombia cual ta esun di turismo medico.
E sectornan cu Colombia ta enfoka riba dje ta, watermanagement, transporte & logistico, sector primario, ciencia & salud y industria creativo. Colombia su economia ta crece cada aña cu dos porciento y esey ta brinda oportunidad pa companianan Hulandes sigui inverti den Colombia. Tin hopi desaroyo tumando luga na Colombia y esey ta hopi interesante pa companianan Hulandes. Mirando e vision di Gobierno pa e green gateway ta importante pa Aruba keda mantene contacto cu companianan Hulandes pa convence nan pa uza Aruba como e base pa hasi negoshi na Colombia. E bentaha cu companianan Hulandes tin si nan establece nan mes na Aruba ta entre otro cu nan ta riba un pais den Reino, caminda e sistema legal ta Hulandes. Ademas na Aruba ta papia varios idioma y tin conocemento di e cultura di Colombia.
E funcionarionan di Cas di Aruba, Angelique Thodé y Roy Hart, a haci uzo di e oportunidad pa papia cu personanan cu conoce e mercado di Colombia bon, entre otro Sr. van Bokhoven, director di Holland House na Bogota, kende a remarca cu tin bon combersacionnan tumando luga entre Holland House y ATIA pa sostene companianan Arubiano pa haci negoshi na Colombia. Tambe tabata tin combersacion cu e Minister Plenipotenciario di Colombia, Sr. Alvaro Gutierrez y e representante economico di embahada di Colombia na Hulanda, caminda a discuti respectivamente desaroyonan na Colombia y Aruba y a palabra di lo sigui combersacionnan pa explora posibilidadnan di cooperacion mutuo. A probecha di e ocasion pa distribui documentonan informativo di Aruba, manera e ‘2020 vision, Green Deck Aruba’ y ‘Aruba Dushi Tera’.