BOGOTA, Colombia – E alto consehero presidencial pa e posconflicto di Colombia, Rafael Pardo, a confirma awe cu un funcionario di Nacionnan Uni den e pais, a wordo secuestra pa disidentenan di FARC y parce cu e lo a wordo libera merdia di diahuebs.
“Awe pa merdia, e funcionario di Nacionnan Uni lo wordo libera. El a wordo plagia pa un disidencia di FAR y a anuncia cu nan lo liber’e. E accion aki ta absolutamente inaceptabel,” Pardo a bisa periodistanan riba e incidente cu a tuma luga husto ora cu integrantenan di e Conseho di Siguridad di Nacionnan Uni tabata di bishita na e pais.
E funcionario di nacionalidad Colombiano y identifica como Harley Lopez, a wordo secuestra diaranson pa un grupo di disidente di FARC, lidera pa “Ivan Mordisco”, den e departamento di Guaviare (zuidoost).
E hecho a wordo produci na Barranquillita, un remoto caserio situa dos ora di biahe den e municipio di Miraflores (Guaviare), unda e tabata traha.
“E Gobierno Nacional ta rechasa e lamentabel hecho aki cu ta atenta contra e substitucion voluntario di cultivonan ilicito cu famianan dedica na cultivo di coca den e diferente zonanan di e pais y contra e integridad di e funcionario di ONUDC,’ E Alta Conseheria pa e Posconflicto a indica den un comunicado.
Lopez, a precisa e despacho aki, “pa un parti di un comision lidera pa e alcalde di Miraflores, funcionarionan di e Direccion pa e Atencion Integral di e Lucha contra Droga di e Gobierno Nacional, miembronan di e organisacionnan social, huntanan di accion comunal y funcionarionan di ONUDC.”
E funcionarionan aki tabata reuni cu cerca di 400 campesino di e zona pa socialisa PINS.
Precisamente e Sistema di Nacionnan Uni na Colombia, a condena e secuestro y a exigi e liberacion inmediato di e funcionario.
Consulta pa periodistanan riba cu si e secuestro tabata un retaliacion di e disidencia di FARC pa e labornan di substitucion di cultivonan ilicito cu ta delanta den e parti aki di e pais, Rafael pardo a splica cu “nan ta biba di droga y kier biba di droga.”
Den e anochi di diaranson, e integrantenan di e Conseho di Siguridad di Nacionnan Uni a yega Bogota, pa manifesta riba e tereno su apoyo na e proceso di paz entre Gobierno Colombiano y FARC.
Fuente: www.elnuevodiario.com.ni