CARACAS, Venezuela- E vice presidente ehecutivo di Venezuela, Tareck El Aissami, a informa a traves di su cuenta riba Twitter, cu e medida di suspension di tur tipo di trafico aereo y maritimo. Tambe e intercambio comercial cu e islanan Aruba, Corsou y Bonaire lo sigui di ta suspendi riba orden di e presidente di Venezuela, Nicolas Maduro Moros.
El Aissami a destaca cu e medida aki ta sigui te ora cu e bin un reunion, cu el a cataloga di “alto nivel” entre autoridadnan di e islanan y di gobierno Venezolano. Aki lo mester yega na un plan di accion concreto cu lo mester combati e mafia cu ta horta productonan y ta contrabandea impunemente, materialnan strategico, cu ta afecta severamente e servicio y calidad di vida di e Venezolanonan”.
“Nos no lo permiti mas agresion di e organisacionnan criminal y ta pidi pa laga un banda e inaccion cu ta fomenta impunidad y pa actua pa stop e mafianan cu ta perturba e relacion historico cu e pueblonan ruman den Caribe”, segun El Aissami.
Fuente: https://www.lapatilla.com