Fraude miyonario na PDVSA ta conduci na aresto di 17 persona

0

CARACAS, Venezuela- E fiscal general di Venezuela, Tarek William Saab, a sigura cu 17 ciudadano a wordo aresta. Nan ta parti di un investigacion relaciona cu casonan di corupcion den e sector petrolero, e industria principal di e pais Suramericano, segun AVN.
E detenidonan lo wordo procesa pa e daƱo na e flota di auto di Petroleos de Venezuela (PDVSA), sabotahe na PetroZamora, empresa filial di e compania estatal y contratonan cu prijsnan haltisimo den e Faja Petrolifera di Orinoco (FPO).
Tocante e caso PetroZamora, e fiscal Venezolano a precisa cu nuebe gerente y directornan di PDVSA a wordo deteni y otro ta bou di huisarrest, despues di a admiti e acusacion.
Entre e detenidonan tin Pedro Leon, ex director di e Faja di Orinoco, Manuel Sosa, actor y socio di e empresa Gramal y un ciudadano, Carlos Fermin.
Tarek William Saab a informa tambe riba e caso conoci como ‘Cadivi-Cencoex’, cu ta haci referencia na companianan cu a haya dollar na prijs referencial pa importacionnan cu nunca a tuma luga.
El a bisa tambe cu ta investigando 32 compania di cual 26 no tin registro fiscal. Es decir, cu nan ta “companianan fantasma”.
Ministerio Publico a solicita orden di detencion pa tur e representantenan legal di e 32 empresanan.

Fuente: https://actualidad.rt.com