GENEVA, Suisa- Un fraude cometi door di empleadonan di Cruz Cora a pone cu 6 miyon dollar destina pa combati e virus mortal di ebola na Africa, a disparce. E revelacion tin di haber cu un investigacion interno di con e organisacion a maneha mas di 124 miyon dollar durante e epidemia entre 2014 y 2016, cu a cobra bida di mas di 11 mil persona na Sierra Leone, Liberia y Guinea.
E brote di ebola a cuminsa na Guinea y a spart rapidamente pa Sierra Leone y Liberia. E respuesta di parti di organisacionnan internacional inicialmente tabata hopi slow y e placa, manera cu el a yega, tabata bay masha lihe den compra di suministro y den traslado di trahadonan humanitario pa e luga, segun ABC News.
Di e manera aki, rond di 2,13 miyon di dollar a disparce como resultado di un “probabel colusion” entre e personal di Cruz Cora y empleadonan di un banco na Sierra Leone, según e investigacion. Ta supone cu e placa a wordo desvia rapidamente ora cu nan a regla e tasa di cambio indebidamente na momento cumbre di e epidemia.
E Federacion Internacional di Crus Cora y Mita Luna Cora (IFRC) a declara di ta “indigna” pa loke nan a descubri y cu e tabata fortaleciendo su esfuersonan pa combati corrupcion, incluyendo e limite di gastonan “cash” den un ambiente di risico halto. Di mes manera IFRC ta planea pa manda auditornan capacita hunto e ekipo di operacionnan di emergencia.
Sin embargo, e subsecretario general di asociacionnan di IFRC, Jemilah Mahmood, a subraya cu
“e casonan aki, na ningun manera, disminui e tremendo valentia y dedicacion di miles di boluntario y personal” cu a desempeña “un papel fundamental pa contene y pone un fin na e brote y preveni cu e virus por sigui cana na nivel internacional”.
E conclusionnan di e investigacion interno a wordo publica pa prome biaha dia 20 di October, pero no a wordo difundi ampliamente te cu diabierna, 3 di November ultimo. IFRC a confirma e hayasgo diasabra y a sigura di ta trahando cu e Comision Anti Corrupcion di Sierra Leone pa “investiga y persigui legalmente cualkier persona involucra”.
FICR a revela tambe pruebanan di fraude den otro dos pais tambe afecta durante e crisis di ebola. Na Liberia, e investigadonan a haya “evidencia di fraude relaciona cu prijsnan super halto di productonan di prome auxilio, nomina y pagonan di incentivo boluntario”. E organisacion ta estima e perdida na 2.7 miyon dollar. Mientras cu na Guinea, al menos 1.17 miyon dollar a disparce debi na practicanan di facturacion fraudulento di un proveedor di servicio di Douana.
Fuente: https://actualidad.rt.com/