E seleccion di Francia a gana Croacia 4-2 den un final tenso hunga dia 15 di juli den e stadion Luzhniki di Moscu. Asina tambe e ta corona campeon mundial di Rusia 2018.
Cu un wega excelente, e ekipo Frances a supera e baloroso Croatanan, cu a bringa te na ultimo y ta cay pero cu tur honor. E seleccion di futbol di Francia ya ta bicampeon di mundo y su director tecnico, Didier Deschamps, ta bira e di tres persona den historia cu a gana un mundial como futbolista y como trainer, despues di e Aleman Franz Beckenbauer y e Brazilero Mário Zagallo..
‘Les Bleus’ a probecha e balanan para y a tabata tin un bon maneho di tempo, logrando pa cera e partido cu golnan di Pogba y Mbappe den e di dos tempo, ora cu tabata parce cu e Croatanan tabata cerca di e empate.
E delantero Frances Antoine Griezmann a wordo nombra miho futbolista di e partido y su compañe Kylian Mbappé, cu tin 19 aña a wordo reconoci como e miho hungado di e torneo aki.
Luka Modric, miho hungado di mundial Rusia 2018
E capitan di Croacia, Luka Modric, a ricibi e Balon de Oro pa su desempeño durante e campeonato. De hecho, su seleccion a yega na final di un mundial pa prome biaha den su historia.
President di Croacia, Kolinda Grabar-Kitarovic, prome cu e partido a sigura cu no ta worry si su seleccion gana ya cu e considera cu nan ta “na top di mundo” pa hunga un mundial.
Francia completo,cu a sigui ansiosamente cada gol di e duelo historico aki, a festeha e triunfo di su seleccion nacional.