En conexion cu Dia di Prensa dia 1 di September, Fraccion di partido MEP a haci un recorido na diferente radio, corant y miembronan di prensa como muestra di nos gradicimento na cada un pa e trabou cu nan ta eherce den nos comunidad.
Prensa ta hunga un rol hopi importante den nos sociedad ya cu e proposito di prensa ta pa informa cada ciudadano na un manera obhetivo y real.
Nos ta bibando den un pais na unda libertad di expresion ta un privilegio y bendicion. Y e trabou di prensa ta pa uza e privilegio aki pa brinda informacion den cualkier forma y variedad, sea ta corant, potret, television y medionan digital.
Prensa como tambe nos comunidad mester respeta e libertad di expresion cu nos pais ta gosa di dje. Gobierno, ciudadano y institutonan mester respeta e libertad di prensa y duna prensa espacio pa asina cada miembro di prensa por haci su trabou na un manera corecto segun su consenshi na un mihor manera. Esaki por wordo logra cu un prensa obhetivo.
Fraccion di partido MEP a wordo bon ricibi durante nos recorido na e diferente radio, corant y miembronan di prensa na unda nos a entrega un regalo chikito di nos partido pa recorda cada un cu ta traha pa informa nos pueblo cu esaki mester wordo haci na bienestar di nos pais pa asina garantisa e democracia den cual nos ta kere aden y para firme p’e.