Siman pasa un delegacion di e fraccion di AVP a tene un reunion cu directiva di ATIA pa trata un serie di topico actual y relevante pa futuro di nos pais. Directiva di ATIA a sinti e necesidad pa haya sa e punto di bista di e fraccion di AVP riba diferente tema cu ta importante pa doñonan di trabou. Entre nan e punto di bista di e fraccion riba e reduccion di prijs di coriente pa di tres biaha den shete aña. Aunke ATIA ta di acuerdo cu Gobierno di AVP y Parlamento ta tuma desicion pa baha costo di bida, e kier a haya sa pakico sector comercial y industrial a haya menos reduccion di coriente cu resto di comunidad. Tambe ATIA kier a tende e punto di bista di e fraccion pa loke ta e pensamento pa haci cambio den e edad di pensioen di biehes. Di banda di e fraccion di AVP tabata tin un serie di topico pa cua tabata kier sa e punto di bista di ATIA. Entre e temanan aki tabata tin e tema di introduccion di reglanan nobo riba terenonan cu ta wak cu e concepto di “free enterprise” tin consecuencianan negativo. Tambe a toca e tema di un maneho pa actua cu man duru pa stop companianan di tuma hende ilegal na trabou y combati “cheap labor”, mas regla pa cuido di medio ambiente y incentivonan di inversion local y di exterior, sin cu esaki tin cu bay a costo di nos trahadonan Arubiano, e caracteristicanan netamente Arubiano of di medio ambiente.
TRAHA HUNTO
E motibo pakico e reunion entre fraccion di AVP y directiva di ATIA tabata asina fructifero, ta pasobra a identifica asina hopi tema cu ta na interes general di Aruba, cu ATIA y AVP por traha hunto pa realisa. Hasta riba e temanan cu nan no ta di acuerdo cu otro, ATIA y AVP ta wak caminda pa cana pa yega na mas consenso. Un forma pa traha hunto ta den e “DIALOGO SOCIAL”. Tanto ATIA como e fraccion di AVP ta di acuerdo cu esaki ta un forma pa atende temanan crusial di nos pais, cu envolvemento di tur esnan concerni y cu mescos cu den pasado, por duna resultadonan sumamente balioso pa henter nos pais. Ta pa e motibo aki cu ATIA y e fraccion di AVP, encabesa pa e lider di e fraccion sr. Marlon Sneek, a acorda pa intercambia di informacion importante mes ora y pa tuma contacto cu otro mas lihe ora cu tin un of otro tema di interes general cu mester traha hunto pa realisa.