E caso cu MEP a priminti di yuda e juffrouw di scol cu a hay’e den problema cu su doño di trabou por nada (“pro deo”), pero despues a manda cobra e juffrouw mas cu 30 mil florin, ta un otro ehempel con MEP ta bisa un cos y haci otro. E ta otro prueba di e hipocresia di MEP cu ta haci cu niun hende por confia MEP. (#bonoporconfiaMEP)
INTEGRIDAD
E comportacion di MEP ta bay contra tur norma di INTEGRIDAD, pasobra e ta viola e principionan di actua responsabel den tur situacion, ta confiabel, semper, por splica pakico a tuma tur desicion y keda consistente semper. Esaki ta normanan cu sa usa den husga si un hende of organisacion a actua integro of no. Esakinan ta e mes un normanan cu e partido MEP a uza algun aña pasa den un documento yama “Haci loke ta corecto tambe ora niun hende ta wak”. (“INTEGRITEIT: het juiste doen ook als niemand kijkt”.)
MEP a presenta e documento aki cu nan mes a traha como critica riba loke nan a considera falta di integridad den gobernacion na Aruba. Awor MEP mes, den oposicion ta actua completamente contra di e normanan cu nan mes a fiha. Pasobra den e caso di e juffrouw di scol MEP a viola tur e normanan cu nan mes a menciona den nan documento. E hipocresia di MEP di bisa un cos y haci otro a keda demostra den e echo cu MEP a priminti di yuda e juffrouw den su caso contra su doño di trabou “por nada”, pero despues a manda cobr’e un suma masha halto mes. Den e caso aki atrobe MEP no a actua responsabel, transparente, MEP no por splica nan comportacion y MEP no a actua consistente. MEP a cambia completamente e promesa di “por nada” den un recibo inespera di mas cu 30 mil florin. Pa colmo, den e documento cu MEP a presenta riba integridad MEP ta bisa entre otro cu “tin hopi polarisacion den politica na Aruba cu e consecuencia cu tin hopi desconfiansa den comunidad mes. Politiconan por duna un bon ehempel cu lo haci cu otronan lo sigui e bon ehempel aki. Ta pa e motibo aki nos (MEP) ta tuma e iniciativa.” E caso di e juffrouw sigur no ta un bon ehempel di integridad y di actuacion responsabel, transparente y consistente. E no ta un ehempel cu Bo kier pa otronan sigui! MEP completo como partido sinembargo ta defende e actuacion aki di priminti ayudo “por nada” anto manda cobra un suma halticimo despues. Esaki ta INTEGRIDAD segun MEP! Fraccion di AVP ta condena e actuacion insincero y e comportacion hipocrita di MEP. E falta di INTEGRIDAD di MEP ta demostra un biaha mas cu MEP awe ta bisa un cos publicamente y riba FACEBOOK y ta actua totalmente contrario ora niun hende ta wak! Ta pesey hende no ta confia MEP.