BAGDAD, Irak – Forsanan Iraki y Kurdo a gana teritorio diahuebs cerca di Mosul, nort di Irak, como parti di un gran ofensiva destina na recupera e metropolis for di mannan di e grupo extremista autodenomina Estado Islamico (EIIL, ISIS of Daesh), fuentenan militar a informa.
E forsanan antiterorista a reporta di a “libera” e ciudad di Bartella, predominantemente Cristian y situa na 10 kilometer oost di Mosul, DPA a splica.
“Nos forsanan a pone eynan e bandera Iraki,” Walid Jaled, miembro di e forsanan aki, a bisa. Previamente, forsanan gubernamental y combatiente tribal, a recaptura diahuebs tres poblacion ubica zuid di Mosul, segun brigadier Raad Mahmud a informa.
Mientras tanto, fuentenan di e Forsanan Peshmerga di e region di Kurdistan, a indica cu nan a tuma posesion di 12 pueblo noordoost di Mosul.
E prome minister Iraki, Haider Al Abadi, a bisa awe cu e forsanan di su pais ta avansando riba Mosul mas rapido cu lo planea.
“E forsanan di siguridad ta busca pa libera Mosul cu un minomo di perdida,” Al Abadi a bisa den un video transmiti durante un reunion internacional na Paris.
E funcionario a añadi cu su Gobierno ta trahando riba un plan integral pa ofrece ayudo na e habitantenan di Mosul cu a wordo afecta pa e violencia.
Ta calcula cu 1.2 miyon di civil, incluyendo por lo menos 600 mil mucha, ta atrapa den Mosul. E ciudad a wordo tuma pa ISIS mediado di 2014.
Den e mesun conferencia, e presidente di Francia, Francois Hollande, a predici cu e lucha pa Mosul lo tuma bast tempo y el a yama na protehe e poblacion civil.
Cu apoyo di Merca y di e Kurdonan, Irak a lansa dialuna un campaña pa recupera Mosul, e di dos ciudad mas importante di e pais. Mosul ta e ultimo bastion di ISIS na Irak.
Mas di 20 minister di Relacionnan Exterior di e coalicion internacional contra ISIS y representantenan di distinto organisacion a reuni diahuebs den e capital Frances, pa debati riba e situacion na Irak.
Fuente: El Universal