Den 2 siman di torneo a cambio di pago pa Lionfish, kier saca afo ken ta e miho matado di Lionfish di Pasco Grandi. Durante e proximo 2 simannan ta reta tur piscado, buceado y amante di lama en general pa forma nan team y participa na e torneo di Aruba LionFish Initiative y participa pa bo team ta e maximo ganado.
Especie invasivo:
Lionfish manera ta conoci ta un especie invasivo cu ta forma un menasa pa nos rifnan, nos industria di turismo maritimo y piscamento en general. E unico forma actualmente ta pa activamente gara esakinan. Den cuadro di esaki a inicia un iniciativa pa crea un centro di distribucion cu ta cumpra y entrega Lionfish pa asina crea un mercado sostenibel pa esaki. Esaki a haña e nomber Aruba LionFish Initiative, tambe ALFI pa mas cortico.
Bon causa:
Pa fomenta participacion ta organisando un torneo proximamente unda ta reta e fanaticada di lama pa trece Lionfish, pasando pret, trahando pa un bon causa y wordo paga pa esaki tambe. Na final di e torneo lo tin plakkaat y premionan pa ganadonan.
Mas informacion:
Desde e fin di siman aki caba por cuminsa registra y pisa bo Lionfish pa e torneo aki. En cooperacion cu Aruba Reef Care Foundation, Fundacion Centro di Pesca Hadicurari como tambe Santa Rosa, lo ta registrando Lionfish na Nos Clubhuis di Hadicurari na oranan specifico. Pa mas informacion, manera regla, orario di entrega y pago etc., por acudi na pagina di facebook di Aruba LionFish Initiative of na e miembronan di comite organisado.
Gran final pa publico:
Diasabra 22 di April proximo, Dia di Mama Tera, lo clausura e torneo na Centro di Pesca Hadicurari cu un tremendo ceremonia di clausura cu lo tin un cookout, demostracion, musica y mucho mas desde 12’or di merdia. Popular na esaki ta e muestranan di Lionfish cu lo keda reparti entre e publico presente e atardi ey. Di awo caba ta invita un y tur pa participa tanto na e torneo como na e evento di dia 22 di April proximo.