Parlamentario mr. Juan E.Thijsen tambe ta sigi di cerca e situacion di comerciantenan di Caya Betico Croes. Recientemente e situacion a escala cu comerciantenan preocupa a bai parlamento pidi gobierno pa haci algo pasobra nan no por mas. Segun Parlamentario mr. Juan E.Thijsen for di cuminsamento di renovacion e gobierno aki incluyendo Mike Eman, Benny Sevinger y Otmar Oduber a faya. E projecto a cuminsa sin ningun respet y muestra di preocupacion pa loque por a pasa cu e comerciantenan. Al contrario trabao inicial a laga Caya Betico Croes como un campo di guerra manera nos a wak na Bagdad y Siria.
Trafico tabata full bruha y compradornan no tabata tin lugar di parkeer y tampoco caminda pa yega na e comercio. Consecuencianan pa comerciantenan no a tarda y ta varios comerciante tin cu no a wanta ni sikiera e finalisacion y apertura di e renobacion. Una vez e projecto a keda cla ata otro problemanan a bin dilanti. E tram no a resulta y no tabata trece clientela den caya Betico Croes pa cumpra, e tram a bira un medio pa kiero den caya. Alavez e trafico di custumber den caya Betico Croes a ser para. Pa haci e situacion pio ainda Otmar Oduber a bin cu e briyante idea di parkeermeter, klem y Aruparking. Di eynan problemanan pa comerciante a bira pio y grave.
Segun Parlamentario mr. Juan E.Thijsen tambe e comerciantenan tin cu enfrenta e problema di adictonan ambulante cu nunca a ser soluciona y tambe Servicio di Impuesto ta riba hopi comerciante pa debenan atraza na unda boluntad pa paga tey pero ya no a keda e medionan pa paga. Tur esaki a culmina cu comerciante a uni y a yega asina lew di acerca gobierno y parlamento den un pleno reunion publico ya cu e situacion a bira desesperante. Ministro Presidente a priminti e comerciantenan di ataca e problema pero un paar di ora despues Fraccion di AVP ta vota contra un mocion di MEP den bienester di comerciantenan di Caya Betico Croes. Parlamentario mr. Juan E.Thijsen ta sigui bisa cu tur parti di mundo unda tin un gobierno responsable prome cu cuminsa un proyecto di impacto grandi riba un comunidad gobierno ta informa, delibera y yega na un acuerdo cu afectadonan di e projecto. Den e caso di e renovacion di Caya Betico Croes bo tabata tin varios stakeholders manera e comerciante, usadornan di trafico den e vecindario, personal cu ta traha den e vecindario y clientenan cu ta haci compra cerca e comerciantenan. Segun parlamentario mr. Juan E.Thijsen, ta di lamenta cu gobierno no a bin cu ningun plan con e ta yuda e comerciante carga e consecuencianan di e renobacion. E ayudo por a encera un alivio fiscal pero tambe un compensacion financiero. Esaki no a sucede na comienso ni ora a introduci e medidanan di klem, parkeermeter y Aruparking door di Otmar Oduber cu apoyo di e gobierno. Parlamentario mr. Juan E.Thijsen ta kere cu un plan di ayuda y recompensa por a evita kiebra di hopi empresa di Caya Betico Croes y tambe por alivia esnan cu awor ta luchando pa sobrevivi. Awor mirando cu e gobierno di AVP no por atende e problema exitosamente ya cu nan a mustra incapacidad pero tambe falta di boluntad, ta keda pa un gobierno nobo den cuadra di un economia fuerte bin cu maneho pa yuda tambe e sector comercial di Caya Betico Croes y vecindario pa nan tambe por tin e progreso cu nan merece. MEP y su persona ta cla pa e reto, parlamentario mr. Ady Thijsen a finalisa bisando.