Ta hopi tristo pa skucha Prome Minister Mike Eman declara, relaciona cu e caso di Paul Croes, cu Aruba awor numa via Directie Wetgeving ta bezig ta copiando e Constitucion di St. Maarten pa loke ta persecucion penal di ministernan acusa di corupcion.
Partido ReD for di su programa di 2005 a sugeri e cambionan ey den nos constitucion, entre otro cu ta schors un minister mientras cu e ta den funcion. Nos ta den 2017 y ni MEP ni AVP a percura pa e cambionan aki, pasobra tabata tapa corupcion di nos gobernantenan pa añanan largo. Aki nos ta presenta e parti aki di e programa di e partido blanco di 2005 y awor atrobe ta den programa di 2017, pa asina gobierno di Aruba haya sa kiko nan mester hasi:
“Habri combersacion den ‘Ministeriele Samenwerkingsraad’ pa aserca Presidente di Corte Superior y e dos Procurador General pa tin un ‘Eenheid in het Vervolgingsbeleid inzake Corruptie-bestrijding conforme art.62 lid 2 e ‘ Samenwerkingsregeling Nederlandse Antillen en Aruba’ pa asina cumpli cu ‘ley pa un, ley pa tur’ y asina evita asta e pensamento c u lo tin husticia di clase;
Revocacion di e derecho pa subi lista (atrobe) si un politico ser haya culpabel pa hecho cu tin di haber cu corupcion, malversacion di placa of entrego di patrimonio di pueblo, falsificacion di documento of otro caso serio cu tin di haber cu su posicion of otro casonan serio cu ta haci moralmente indeseabel pa bolbe cubri e funcion publico etc. Esaki por ser haci pa medio di un ley formal(nobo) of cambio y ampliacion di articulo 4 di nos Kiesverordering (Lv. Di 3 november 1987, A.B. 1987,110);
Regla un ley nobo, comforme e espirito di articulo 2 lid b y 87 e.v di LMA, juncto art.86 di Codigo Penal (manera cambia den Ab. 1999 no 24), esta e suspencion di un Parlementario of Ministro den funcion durante e investigacion pa casonan manera menciona aki riba, te ora e caso ser trata of e funcionario ser declara liber di e acusasion. Esaki pues, igual cu ta conta pa (otro) empleado publico y manera regla den LMA: schorsing como un ‘orde-maatregel’ pa por haci e investigacion necesario y no como castigo pasobra ta den corte ta dicidi ariba culpabilidad/inocencia;”
Ta hopi preocupante loke nos Prome Minister a declara cu PG ta ricibi ordo di gobierno ken ta persigui y kende no. Eman a bisa cu esaki a sosode bao di MEP, pero esaki tabata y ta practica di AVP tambe. Pesei no tin husticia, of miho bisa tin husticia di clase na Aruba.