For di Fitch Ratings a ricibi e noticia cu e credit rating (grado di credibilidad financiero) di Gobierno di Aruba a wordo manteni. Esaki ta resultado di un evaluacion teni door di Fitch Ratings despues di un bishita di trabao efectua na Aruba den final di e luna di Maart caminda cu a topa cu varios actornan den Gobierno y sector priva.
E ratings outlook, cual ta refleha e prospecto cu Fitch ta hiba pa un mehoracion di e rating den futuro inmediato, a bira negativo. Esaki ta refleho di e hecho cu e crecemento economico cu a wordo premira bou di gobernacion anterior no a ser materialisa. Esaki pa gran parti ta debi na e situacion rond di e posibel reapertura di e refineria.
Fitch ta comparti e pensamentonan di Gobierno actual cu ta boga pa un crecemento economico mas realistico den e aña cu ta bin. Fitch ta indica cu a pesar cu den e añanan anterior crecemento economico tabata menos toch Gobierno anterior tabata indica cu lo reduci e deficitnan financiero. Esaki, manera ya ta conoci, despues di varios intentonan incidental door di e gobernacion anterior no a duna fruto mas desde aña 2017.
E resultadonan financiero ta conoci pa un y tur. E falta di tuma pasonan structural e tempo ey combina cu un crecemento economico menos cu proyecta ta ser mira como e motibonan principal pa e situacion financiero actual.
Fitch ta duna reconocemento na e decisionnan dificil tuma e aña aki pa e gobernacion actual pa purba reduci di manera structural e deficitnan financiero. Como otro puntonan fuerte cu ta ser accentua pa Fitch pa e grado di credibilidad ta e stabilidad politico, e grado halto di desaroyo y e relacionnan constitucional cu Hulanda.
Gobierno di Aruba, en particular e ministro encarga cu Finanzas, Economia y Cultura, Sra. Xiomara Ruiz-Maduro, ta gradici tur esunnan cu di un forma of otro a coopera na e resultado aki. Aunke cu e desafionan financiero grandi nos dilanti ta grandi, a logra cuminsa gana e confiansa bek di esunnan cu tin di evalua credibilidad financiero di Gobierno. Masha danki na un y tur y hunto nos lo saca Aruba dilanti.