GUAYAQUIL, Ecuador – Fiscalia di Ecuador e efectua diabierna un razzia den e oficinanan di e empresa Odebrecht na Guayaquil (zuidwest), Ecuador, unda cu a confisca documentonan cu por ta relaciona cu informacionnan riba supuesto soborno pa mas di 35.5 miyon di dollar na funcionarionan di Gobierno.
Den e registro, realisa durante e madruga pa polis y ministerio publico, a confisca 23 carpeta, dos carpeta di manila, tres buki y 23 schrift, ademas di dos CD y cuater laptop, ministeri publico a informa diabierna.
E agentenan a confisca ademas un CPU y dos hard disk, segun fiscalia, cu a solicita asistencia penal riba e caso aki na Merca, Brasil y Suecia.
E operacion di Fiscalia a tuma luga den dos oficina situa den e interior di un centro comercial di e ciudad portuario y segun ministerio publico a indica riba nan cuenta di Twitter, “busca evidencia documental, material y digital cu por relaciona” cu e caso.
Fiscal General, Galo Chiriboga, a considera diahuebs cu e informenan solicita na Merca y Brasil riba posibel ramnificacion di e asunto na Ecuador lo duna “base suficiente” pa investiga supuesto sobornonan na funcionarionan di e Gobierno Ecuatoriano.
“Cu e informacion cu Brasil tin y cu a manda pa e Departamento di Husticia di Merca, nos tin un base suficiente pa traha,” Chiriboga a bisa.
E Departamento di Husticia di Merca, segun documentonan publica e siman aki, a señala cu e constructora Brasileño Odebrecht a paga aproximadamente 788 miyon di dollar na soborno den 12 pais di Latino America y Africa, incluyendo Brasil.
E informe di e Departamento di Husticia ta indica cu na Ecuador, entre 2007 y 2016, e constructora a haci pagonan corupto pa balor di mas di 35.5 miyon di dollar na “funcionarionan di Gobierno,” loke a genera den beneficionan di mas di 116 miyon di dollar.
E Gobierno Ecuatoriano di su parti, a bisa diahuebs cu e no ta descarta cu tabata tin “pago of actonan di corupcion” di e empresa Brasileño cu ta involucra funcionarionan, pero ta sigura cu su actuacion den relacino cu e compania aki tabata corecto y a recorda cu el a wordo expulsa di e pais na 2008, aunke despues el a bira contratista bek di e estado.
Fuente: NTN24