Diabierna 9 September 2016 den Corte di prome instancia a tuma luga e caso di tiramento cu morto pafo di Molen, unda e sospechoso principal ta Michelangelo Trenidad conoci como Yellow.
E tiramento mes a tuma luga 7 December 2015 den careda di 4:50 marduga, unda un cabayero a fayece y un otro cu tambe a keda tira a keda basta malo unda no por move. Despues di basta buskeda riba 15 februari 2016 den oranan di atardi autoridad a detene Yellow na un cas na San Nicolas.
E sospechoso mes ta cera na prizon den exterior, y den siman el a yega Aruba y a keda hiba pa KIA bou vigilancia di Arrestatie Team. Diabierna mainta Yellow a yega Corte y asta e complise R.R. van de B. tambe tabata presente.
Fiscal ta haya cu Trenidad ‘ Yellow ‘ ta culpabel di homicidio di e victima bouncer fam D., y intento di homicidio di e otro victima bouncer fam A.M. Fiscal a comenta cu ta considera cu Trenidad a tira cu un arma di candela, consecuencia cu bouncer fam D. a fayece y A.M a resulta heridal di tal gravedad cu e lo keda handicap pa resto di su buda.
Ta trata di hechonan castigabel y hopi grave y dos bida di hende. Famia di e victima mortal y di A.M ta kibra y nan tristeza enorme. Loke a sucede a shock comunidad y a lanta senimentonan di inseguridad. E por a hasta daña turismo, mirando cu Olde Molen ta un luga cu hopi turista ta bishita y ta riba e hotelstrip. Segun fiscal Yellow, tin cu djis trata di imagina su mes con e lo sinti si su ruman a wordo tira mata. Pa colmo a dura casi dos luna prome cu Yellow a keda deteni pa loke fiscal ta mustra ki tipo di persona Yellow ta, cu prome ta tira hende cu arma di candela y despues bay sconde.
Contra e otro sospechoso R.v.d.B fiscala exigi 2 aña di prizon pa posesion di un arma di candela y complise.
Huez a tuma su tempo pa scucha e dos sospechosonan. Nan no a bisa mucho, mas tanto “Si” y “No” y “Nan ta gaña” y “Mi no sa” y “Nan ta papia coy loco”. Yellow. a declara na inicio cu e no a hacie intencionalmente. Segun yellow, e bouncernan di Olde Molen a bringa cu ne y nan a tire abao. E arma di candela di un di e bouncernan a sali cay y el a cohe y tira cu ne den layra. E no a ripara cu hende lo a wordo ranca. Djey el a zway e arma bente y bay for di e sitio. Cualkier otro declaracion di e bouncernan y e testigonan, ta mentira, segun e. For di e curpa di e victima cu a fayece a saca dos bala y e tabatin tiro na su pecho y lomba.
Polis a scucha e cuatro bouncernan cu tabata na e sitio y na Januari a tuma declaracion tambe di e victima A.M. Tabata net prome cu A.M. a wordo transporta pa Colombia. E no tabata por a papia, pero si move su lipnan y asina el a comunica cu recherche. El a declara cu Yellow a tira riba dje, pasobra nan como bouncer a stop un pelea.
Tur e bouncernan a declara den e mesun liñea, cada uno for di su angulo. Basicamente nan ta bisa cu Yellow. y su gang tabata bringa cu dos Colombiano y cu nan a kibra e pelea. A sigui discusion y Yellow a haya mokete di sigur un bouncer. Prome cu el a bay pa un auto cu tabata para mas leu, un di e bouncernan a scuche bisa e victima A.M.: “Yo vengo por ti” y “Bo ta bay ****”. Una vez na e auto, segun declaracion di dos di e bouncernan, a surgi manera un lucha cu un homber cu cabey largo (cu Polis a reconoce riba video di seguridad despues como e sospechoso V.d.B.). Un di e bouncernan a wak e ta discuti cu e homber aki, un otro a wak cu e homber no kier a dune “algo” y cu tabatin un lucha. Finalmente e homber a dune “algo” y el a cana bin dobla stret den direccion di e bouncernan. Un di e bouncernan a bisa e otronan pa tene cuidao, pasobra e tin “algo”. E ora el a saca e arma y a los tres tiro riba A.M. E victima a cay sinta y djey un tiro mas, y el a cay drumi. D. a bay riba Yeloow y a bula sinta riba dje pa purba kita e arma for di dje. E ora Yellow. a los dos tiro riba dje.
E sospechoso V.d.B. a bisa cu e no tabata ey mes, aunke cu hues a mustr’e video riba cual un persona cu parce masha hopi mes ta visible.