WILLEMSTAD – Den kuadro di e Flow Carifta Games 2017 partidonan a firma e kontrato djabièrnè último 16 di sèptèmber.
Esaki ta tuma lugá na Hilton Hotel entre e partidonan ‘North American Central American and Caribbean Athletics Association’ (NACACAA), ‘Curaçaose Atletiek Bond’ (C.A.B) i e fundashon ‘Organisatie Atletiekevenementen’ (StOA).
Fuera di Promé Minister Ben Whiteman i Minister Irene Dick, tambe tabata presente e Kònsùl General di China, CTB, Reda Sosial i diferente representantenan di e patrosinadornan lokal. Atletismo mes tabata bon representá pa medio di Churandy Martina, Liemarvin Bonevacia i diferente otro atleta.
NACACAA tabata representá pa medio di su Presidente Victor Lopez i Sekretario General Serralta, ku a biaha pa Kòrsou for di Puerto Riko. NACACAA ta e doño di e ‘Flow Carifta Games’, kaminda e di 46 edishon lo wòrdu organisá na Kòrsou dianan 15,16 i 17 di aprel 2017 próksimo. Mas ku 25 pais lo partisipá ku mas ku 600 atleta hóben. E komité organisadó StOA, ya a kuminsá ku e preparashonnan for di 2015, kaminda Gobièrnu di Kòrsou ta hunga un ròl esensial.
Despues di e diskursonan di presidente di C.A.B. Willem Cordilia i e presidente di NACACAA Victor Lopez, Promé Minister Whiteman a deklará ku Gobièrnu ta para kompletamente tras di e evento, i ku e proseso di supsidio a terminá. E la informá StOA ku nan lo por uza e montante nesesario riba un término kòrtiku.
Despues ku presidente di StOA, Igor Cyntje, a duna su diskurso, partidonan a firma e kontrato i a selebrá e akto ku un bríndis i un resepshon. E organisashon di e ‘Flow Carifta Games’ no ta benefisiá solamente e deporte di atletismo, pero tambe ta pone Kòrsou den ‘spotlight’ komo destinashon turístiko pa e region di Karibe.
Mas informashon ta disponibel riba www.carifta2017.com
StOA:
E fundashon Organisatie Atletiek Evenementen (StOA) a wòrdu lanta den òktober 2015 dor di Curaçaose Atletiek Bond (C.A.B.). Despues di e organisashon di CARIFTA Games 2017 e fundashon aki por wòrdu aktivá pa otro futuro evento di atletismo. E meta di e Stichting aki ta pa organisá e CARIFTA Games 2017 eksitosamente i tambe aktivá e desaroyo di atletismo en general na Kòrsou.