Dia 17 di Juni for di 11:00 am -1:00 pm nos ta conta cu presencia di Lily Clarisa cu lo ta presente na Plaza Bookshop pa presenta y firma su buki ‘Lost Love Poems’ na tur su publico.
‘Lost Love Poems’ ta un coleccion di 49 poesia cu ta hibabo riba un biahe emocional for di etapa di amor te cu periodo di desamor.’Lost Love Poems’ ta hibabo door di e aventura cu yama amor; e parti bon, e malo, e deseo, e desesperacion te na olvido y desamor. Na final, ora bo pensa cu amor ta caba na nada, e chispa ta cende bek y e ta cuminsa full di nobo.
E storia di Lily Clarisa:
Ya for di chikito caba Lily Clarisa a cuminsa skirbi poesia, novela pa hoben adulto y tambe storia pa mucha (pendiente publicacion). Na 2015 y na edad di binti tres aña, el a publica su prome buki di poesia titula ‘Lost Love Poems’. E prome parti di e buki ‘Lost Love Poems’ ta concentra riba e inocencia, puresa, anhelo y e efecto casi obsesivo. E segundo parti ta cubri efecto devastador cu amor por tin y cu ta laga bo sinti perdi. E mensahe cardinall cu ‘Lost Love Poems’ ta trece dilanti ta pa nunca stop di kere den bo mes, ni den otro. Amor por kibra, kima y caba, pero bida ta sigi; acepta e dolor, pasa door di e proceso pero sigui pa dilanti, stima otro y stima bo mes, prome cu tur cos.
Lily Clarisa tambe ta un artista-interprete di arte y ta recita su poesia durante evento ‘Poetry Nights on Aruba’ presenta pa BASHA Foundation. E ta docente di Ingles y escritora. Lily actualmente ta studiando pa obtene su BA den Teaching English as a Foreign Language for di Windesheim college situa na Zwolle, Hulanda. Actualmente, Lily ta duna les di ingles na studiantenan di EPB HATO na Oranjestad, Aruba.
Lost Love Poems ta obtenible awe mes na Plazabookshop pa Afl 38,-.