LONDON, Gran Britania – Polis a detene un homber di 40 aña como sospechoso di e asesinato. E homber tabata biba na e mesun direccion.
Simonne Kerr, finalista di e edicion di e aña aki di e concurso televisivo “Britain’s Got Talent”, a wordo asesina na su cas, victima di varios hinca, segun The Sun a informa.
E suceso tragico aki a tuma luga diaranson na Battersea, un bario zuidoost di e capital Britanico. Polis a kibra e porta di e vivienda despues di a ricibi un yamada di aviso y paramediconan cu a acudi na e luga no por a haci nada pa salba e bida di e muhe.
Un homber cu ta biba na e mesun adres a wordo deteni como sospechoso di e asesinato. Desmond Sylva, di 40 aña, a bin dilanti mesa berde diabierna, unda el a nenga su culpabilidad durante un audiencia breve , The Guardian a informa. Simonne Kerr, cu tabata tin 31 aña tabata traha como verpleegster di hematologia y oncologia den un hospital di London. E muhe a a bira conoci pa a yega e final di ‘Britain’s Got Talent” cu e coro B Positive, na cual el a dicidi di uni su mes pa alenta e poblacion pa duna sanger.
Kerr tabata bisa cu su actuacion den e programa a dun’ e forsa despues di cu su yiu di 6 aña a muri na 2015, door di un anemia.
B Positive ta un coro forma pa personanan cu ta sufri di anemia of cu tin personanan cercano diagnostica cu e malesa aki como un iniciativa pa aumenta e consciencia riba e problema aki y fomenta e donacion di sanger.
Fuente: RT Actualidad