Festival di Dande Infantil y Hubenil 2017 lo tuma luga dia 28 di December pa cual Sra. Ray Ann Hernandez, di e comision organisador ta splica mas di e festival aki.
E festival lo tuma luga na Centro di Bario Tanki Leendert y tin un total di 30 participante di Dande y 3 composicion di fin di Aña, cualnan ta wordo compaña pa 6 banda. Tur cos lo cuminsa diahuebs dia 28 di December, pa 6 or di atardi na Centro di Bario Tanki Leendert. E bar y cushina lo ta bon surti. Ta pidi e pueblo pa ta na ora, ya cu e festival lo ta cumisnando pa 6 or. Tambe ta pidi pa bin trempan pa haya un bon luga di para auto, y tambe bin prepara cu paraplu mirando e tempo di awasero. Bin apoya e muchanan cu ta duna nan aporte na nos cultura.
E reaccion pa trece e festival bek pa Centro di Bario Tanki Leendert, tabata uno hopi positivo, mirando cu e ta un luga mas chikito, mas familiar. E aña aki tin categoria di 4 pa 6 aña, 7 pa 9 aña, 10 pa 12 aña y 13 pa 17 aña. Sra. Hernandez a splica cu aña pasa nan tabata tin 1 of ta 2 participante den categoria 4 pa 6 aña , y e aña aki nan tin 6 participante den e categoria aki.
E festival ta creciendo den e chikitonan. Den e otro categorianan, e ta parti casi igual den cantidad di participante. Tabata tin un tempo unda cu e grandinan di 13 pa 17 aña tabata un grupo grandi. Aworaki esakinan a bay pa e grupo di adulto, y el a bira chikito. Pero e ta crece bek den e categoria mas chikito. Esey ta e intencion, unda ta haya e participante cu a crece den e festival y ta bay participa den e festival di adulto.
E comision organisador tin mayoria di e cantica y e dandenan documenta. Ta 17 aña, cual ta basta cantica cu nan tin, cual ta bira un trabao di saca e mihonan y traha un DVD/CD, dus saca un produccion. Kisas esey ta pa ora cu nan yega 20 aña.
Por ultimo, Sra. Hernandez a invita e comunidad di Aruba pa bin presencia y bin duna aporte na nos dande. E ta e ultimo celebracion, pa por cera e aña den gran forma.