Den nomber di Fundacion Cultural di Festival Folklorico nos ta desea pueblo di Aruba un Feliz Pasco ainda.
Tur cos ya ta cla pa e di 44 Festival di Dande cu lo tuma luga riba dia 29 di december 2017 na Plaza Betico Croes pa 7’or di anochi cu canto di nos dushi Himno ‘Aruba dushi Tera’ canta door Jorzinho Schlipken Croes .
E biaha aki un total di 14 agrupacion, 32 Dande y 6 Propio Composicon lo competi den e festival aki.
Agrupacionnan cu lo ta riba escenario durante e anochi aki di Dande y propio composicion lo ta; Tico y su Tipico, Tipico Alegre Noord, Tipico Macuarima, Tipico Wanglo, Tipico Palisia, Edjean y su Grupo, Tipico Alegre Kadushi Largo (TA KLA), Tipico Ambiente, Alma Folklorico, Paranda ta Nos, Nelson y su Tipico Luz di Luna, Tipico Swipe, Stimami, y Sonido di Antaño. Nan tur hunto lo competi y na final Aruba lo conoce su Rey y Reina di Dande.
Durante e anochi aki lo reconoce 7 persona pa dedicacion na cultura.
Maria Antoneta de Lourdes Werleman
Ronny Croes
Thomas Croes
Fanny Ras
Federico Danjo
Hose Fernando Orman
Tico Oduber
Tambe lo tin diferente tent cu cosnan dushi, pasa bosa pa un y tur disfruta. Bin cu famia completo y e hobennan laga nan cera conoci cu nos tradicion di fin di aña di nos Dande. Hunto ban disfruta di nos dushi cultura di dande cu ta di nos. Cultura ta nos y nos mester cuid’e, promove y conta otro di dje.
Manera ta un tradicion pa hopi aña caba Fundacion Cultural di Festival Folklorico den nomber di su presidente Sr. Harry Croes ta invita bo pa bin disfruta e Festival di Dande 2017. Entrada ta gratis.