Bon Bini, MasNoticia

E di shete sospechoso relaciona cu Atraco CMB Airport 2011 a yega Aruba y a detene di biaha

masnoticia — Fri, 24 May 2013 01:57:46 +0000

Tur hende ta corda riba 13 di September 2011 den oranan di mainta un atraco a tuma lugar riba e sucursal di CMB na Airport ora cu personanan desconoci a drenta cu arma y comete un atraco. Nan a bay cu un botin basta grandi entre otro placa di Aruba y tambe cu Euronan. Riba 14 September 2011 na Airport anochi a detene e prome sospechoso di fam Balentina cla pa subi avion pa bay Curacao y a haya un cuantioso di miles di placa y Euro den su poder. Riba 15 di September a detene otro tres sospechoso meti cu e atraco cual tabata hospedando na La Cabana Hotel ora Arestatie Team a kibra porta di camber y drenta y topa cu e sospechosonan y den e camber mas di 200 mil florin cash. Despues di algun dia na Curacao Husticia di Curacao a logra detene otro dos atracador relaciona cu e atraco di CMB Airport Aruba, cu esaki a cera total di 6 persona. Pero tabata falta uno cu autoridadnan tanto di Aruba y Curacao nunca no por a haya.

23 di Mei 2013 diahuebs atardi vuelo di KLM a yega Aruba cu destinacion di Hulanda un homber busca pa hustica a kere cu nan no lo gare y locual cu e tabata meti den dje a muri a faya. Posibelmente e sospechoso aki a bin Aruba pa un evenemento grandi cu lo bay tin banda di lama pero BINGO a canta na Airport ora cu e sospechoso aki a yega na inmigracion y aki sistema a indica cu ta un persona busca pa husticia algun aña caba. Di biaha e Polis di Grensbewaking a detene y pone atraco team y demas recherchenan na altura di esaki. E sospechoso a keda hiba Departamento di Recherche di biaha.

Bon trabou na autoridadnan di Grensbewaking, Inmigracion cu no ta drumi y asina ta logra na gara sospechosonan busca pa husiticia cu kier crusa frontera.

The post E di shete sospechoso relaciona cu Atraco CMB Airport 2011 a yega Aruba y a detene di biaha appeared first on Bon Bini, MasNoticia.

Presidente di Parlamento: Banco Central tin su preocupacionnan pa loke ta e deficiet financiero di Gobierno

masnoticia — Fri, 24 May 2013 01:51:38 +0000

Banco Central a duna un presentacion na e comision di finansa di Parlamento e siman aki y Parlamentario Paul Croes a splica cu a trata diferente topico manera e.o. finansa di Gobierno, e balance of payments y foreign direct investments. Durante e presentacion aki diferente cifra a bin dilanti.

Banco Central tin un proyeccion pa loke ta trata anja 2013 di un crecemento economico di 2.6% mara na un suma di e deficiet financiero. Inicialmente Gobierno a proyecta un crecemento di 5.1% pero Banco Central despues di a haya mas cifra y informacion, a adapta e cifra aki na 2.6%. Un aspecto alentador durante e presentacion, ta e proyeccion pa 2014 unda cu Banco Central ta proyecta un crecemento di 3.5% di e crecemnto real di nos GDP. Esaki ta mustra cu pa otro anja Banco Central tin un proyeccion positivo pa locual ta e crecemento economico y nan ta mar’e na crecemento di nos turismo y e apertura di Ritz Carlton.

Asina mes Banco Central tin su preocupacionnan pa loke ta e deficiet financiero di Gobierno. E proyeccion pa presupuesto 2013 ya tin cambionan caba cu ta wordo premira durante e tratamento. Banco Central tin cierto conclucionnan riba esaki y ta bisa cu sin ahustenan y medidanan adicional, nos debe compara cu nos GDP lo por yega rond di 80% pa anja 2015-2016. Gobierno mester hisa entrada y baha gasto. Banco Central a duna cierto recomendacionnan pa Gobierno.

Presidente di Parlamento ta invita publico en general pa sigui e reunionnan publico pa asina pueblo haya un bista di unda ta bai tuma medidanan.

The post Presidente di Parlamento: Banco Central tin su preocupacionnan pa loke ta e deficiet financiero di Gobierno appeared first on Bon Bini, MasNoticia.

Ban Yuda Fichin diadomingo awo

masnoticia — Fri, 24 May 2013 01:48:46 +0000

E grupo di Harley Nos Cu Nos, cu ta e grupo cu mi ruman Fichin tawata forma parti di dje ultimamente, lo bay recolecta placa banda di caminda den nan helm pa asina doneer esaki atardi na nos familia na CB Playa Pabao. E camindanan cu nan lo bai para lo ta: Luz Trafico Piet Soda Fontain, Luz di trafico Sta Cruz y dilanti Royal Plaza. Esaki ta na encargo y supervision di sra. Mariela y Tony Bosch y miembronan di Nos cu Nos.
Evento lo ta dia: 26 Mei, 2013 Diadomingo Ora: 10 am-7 pm Lugar: CB Playa Pabao
Nos a bende cuminda Criollo traha na cas cu ticket adelanta: Di 500 ticket a yega 800 ticket bendi adelanta. Afls. 12,50 pa ticket. Cumindanan cu lo tin pa busca entre 11:30 am-3 p,m. ta: Spareribs stoba cu snijbonen Pia Galinja hasa cu saus criollo
Kabrito Stoba
Beef cutsmall
Papaya Stoba
Carni Stoba
Balchi Carni
Tur cuminda ta companja cu aros, salada y banana hasa Lo tin algun cuminda pa bende e dia ey mes na e evento Esaki ta bow di encargo di mi tanta Emely Ridderstap y su crew Na Belgiestraat # 29.
Nos a bende ticket adelanta pa un Koffiemorgen. Afls. 10,= pa ticket ESAKI TA UN SOLD OUT COMPLETO di 100 ticket a sigui te 180 ticket. E koffiemorgen ta consisti di: 7 differrente cos dushi, bo por kies sea un pastechi of croquet, bo por kies sea un koffie of thee of orange juice.
Ta bay tin baki di cos dushi pa bende cu 7 differente cos dushi pa solamente Afls. 7,= aya na CB Playa Pabao mes. Lo tin bolo, cupcakes, chips, boli tambe pa bende apart na e stand aki.
Cushina: Snacks: Croquet, Pastechi, Cheeseballs, Loempia Sandwiches: Pan cu Tuna, Pan cu Cheeseburger, Hotdog, Pan cu Sate, Johny Cake ham & cheese , Pan cu Frekedel Cuminda: Sopi carni, Sopi Seafood, Aroz con pollo y cuminda criollo si resta ticket di e cumindanan ariba menciona.
Bar: Cerbeznan:
Chill, Heineken
Mix drinks: Whisky, Rum
Binja
Refresco color, coca cola, soda, Fusetea, Boter awa

Muchanan: Dino Jump Di Pinnochio di 12 pm- 6 pm Lo cobra Afls. 5,= pa henter e 6 ora pa bula. Esaki pa yuda Fichin. Facepainting y balloon figures di Unique Celebration bow encargo di srta. Valery Eman. Tambe lo cobra pa esaki y na final lo duna un parti di esaki como donacion na Fichin.
Tent: Emo Mystic Nails lo haci bo hunjanan Afls. 45,= full set nails pa e fundraising event Ban Yuda Fichin. Esaki tambe lo bai como donacion na Fichin.
Nos lo tin un box disponibel na e tent cashier cu nos lo aprecia donacionnan di curason di Aruba completo pa yuda mi ruman “Fichin”
Tent: Cuminda criollo di Rincon Boyz: Cabrito Stoba, Cabez Higra. Tambe na beneficio di “Fichin” No a bende ticket adelanta dus esun cu yega ta bende e ora ey y e dia aki na CB Playa Pabao. Tent di Robert Smoke Pit: Famoso pan cu ham horna di pasco.
Rifa durante evento: Weekend Stay Hyatt, Dinners, 2x tablet di Setar N.V., BBQ buffet y breakfast Buffet @ Moomba Beach, Ham Horna di Robert Smoke Pit, Blackberry Digicel.
MC pa e evento e dia aki lo ta bow encargo di sr. Carlmichael “Colochi” Bikker
Apertura: Bunita oracion y alabanza na Honor di nos Senjor Dios pa tur cos den nos bida y pa Juan Federico Zievinger ‘Fichin” y Aruba completo na encargo di Grupo Oracion Cristo Ta Amor bow encargo guia sra. Reina Geerman. Esaki ta e Grupo di Oracion cu su liderazgo ta bow di encargo di mama di FICHIN sra. Sandra Zievinger y aworaki ta wordo dirigi pa rumanan den Cristo sra. Reina, Vera y Dorothy.

Palabra di Bon Bini y apertura official den man di unico ruman di Juan Federico Zievinger, sra Cassandra Orman-Zievinger.
DJ pa entretene di 10 am-12 pm: DJ 101 DJ Chando Colina
Bandanan: 12 pm-12:45 pm: Rubian Reague consistiendo di amigonan di Fichin ya cu ta gusta reague music

1 pm-1:45 pm: Rober y Solo Banda Show

2 pm-2:45 pm: Badu

3 pm-3:45 pm: Upgrade Music

4 pm-4:45 pm: Tsunami

4:45 pm-5 pm: Show di Grupo Capoeira
Brazil bow encargo di instructor Trancinha Danny Marquez (bon amigo d iFichin) cu lo perform e sport/baile aki cu tin mas gruponan cu a bin for di Venezuela, Brazil etc.pa un workshop e weekend aki.
5 pm-5:45 pm: Youth Extreme 6 pm-6:45 pm: Rincon Boyz 6:15 pm: Lo saca RIFA y entrega premionan. 6:45 -7pm Palabra di danki door di ruman Cassandra Orman-Zievinger y crew y clausura cu Mr. Derwin Kemp “Master Gusto” cu su exito y cantica di anja 2012 “Hala mi baranca” (Gospel song) 7 pm-7:45 pm: RINCON BOYZ CLAUSURA

TAMBE VALERO Y DANKI NA SR. LORENZO ARENDS Y AMIGONAN A DICIDI CU RIBA E DIA AKI 26/05/2013 12 AM-11:59 PM CADA AUTO CU TANK E DIA AKI PA CADA LITER LO DUNA FICHIN 1CENT NA E SIGUIENTE VALERO STATIONNAN: VALERO PONTON, VALERO BOULEVARD, VALERO STA CRUZ Y VALERO ESSOVILLE. KEIRO HOPI DIASABRA GASTA E TANKI GASOLINE Y ASINA BAI YENA ESAKI FULL DIADOMINGO Y ASINA ARUBA COMPLETO TAMBE POR CONTRIBUI CU FICHIN.

* Esaki ta e bankaccount di mi tata Juan Federico Zievinger sr. cu por usa pa deposita donacionnan riba dje. E ta Savingsaccount CMB # 101747008 “BAN YUDA FICHIN”.

The post Ban Yuda Fichin diadomingo awo appeared first on Bon Bini, MasNoticia.

Resultado di Weganan di Number Anochi 23 Mei 2013

masnoticia — Fri, 24 May 2013 01:38:34 +0000

Lotto Cambiando bida ta presenta e resultadonan di Wega di Number 23 Mei 2013 y subi website di Lotto riba www.lottoaruba.com Si bo kier e resultadonan den bo Celular sms e palabra Sorteo On pa 1100.

Catochi
1. 8248
2. 8376
3. 5434

Big 4
1. 6562

Zodiac
1. 0365 Sagitario

Lotto di Dia
04 – 05 – 08 – 15 – 18

Wega di Number Korsou
1. 8019
2. 9629
3. 0384

Diario
1. 2286
2. 8087
3. 7930

Super 4
1. 5122

The post Resultado di Weganan di Number Anochi 23 Mei 2013 appeared first on Bon Bini, MasNoticia.

Cu 3 titulo den saco SV Britannia Bright Bakery / Pizza Hut ta habri play off contra RCA diasabra awor

masnoticia — Thu, 23 May 2013 23:50:54 +0000

Despues cu SV Britannia a hasi un renobacion den su filanan y a incorpora varios hungadornan di su farm team di junioren y mayor manera; Camilo Jaimes, , Jan Bant, Johnatan Ruiz, Margin Kock, Niels Stock, Taffie Koelie, Adreian Arbey, Carl Geerman y varios refuerzo hubenil manera; Victor Garcia, Gino Petrocchi y Enzon Parra y tambe Britannia Frisian Flag a bin cu un entrenador den persona di Jose Luis Duran y tres hungador for di Venezuela manera; Renier Paraez, Ruben Garcia y Jaime Hernandez, Britannia tabata sa di subi su nivel di futbol y a logra tres logro grandi, cualnan ta Campion Copa Betico unda Britannia ta gana e propio RCA cu score di 1-0 cual gol a wordo anota pa Ruben Garcia, tambe Britannia ta titula campion di campeonato regular y den e sistema nobo SV Britannia Juice Langer ta sali na prome lugar cu un total di 49 punto. Diasabra awor 25 mei play off ta cuminsa unda SV Britannia Vitamalt lo enfrenta e actual campionan di Aruba esta RCA den C.D. Guillermo P. Trinidad na Dakota pa 8’or di anochi. SV Britannia ta preparando su flanelnan di e forma aki e fanaticonan na un prijs rasonabel bin apoya nan equipo te final. Diasabra awor den C.D.G.T. un puma lo los un biaha mas grrrrrrrrrrrrrrrrrrrrrrrrrrrrrrrrrrrrr.

The post Cu 3 titulo den saco SV Britannia Bright Bakery / Pizza Hut ta habri play off contra RCA diasabra awor appeared first on Bon Bini, MasNoticia.

Segun Fiscal den Corte un agente Policial tambe a haya tratamento for di e supuesto dokter

masnoticia — Thu, 23 May 2013 23:21:59 +0000

Fiscal den Corte diahuebs atarti a repasa e caso di Jose Gregorio Guaimacuto Rojas cu ta gaña rond cu e la studia na Centro Medico Estetico Israel y Centro Medico Estetico Israeñ cu hende por a cay den su wega. Fiscal a comenta con Douanne di Aruba por a permiti Jose drenta cu e productonan ilegal aki y bin trata esaki cu consecuencia di un dama a fayece. Pero un noticia cu a hala atencion cu Fiscal a menciona cu tin un Polis envolvi.
Locual cu Fiscal a menciona diahuebs atardi den Corte di Prome Instancia tabata esaki:
* El a señala, con por ta posibel cu un agente di Polis cu a haya tratamento di e sospechoso, nada a pasa cune.

Aki nos por a tuma nota cu posibelmente un Polis Femenino canando riba caminda a haya injeccion di e supuesto dokter cu hopi a cay den su wega y a resulta cu ta falso, pero cu e agente di Polis aki si ta na bida ainda pero e salud di dje no por comenta si e ta bon fo malo.
Nos lo bay aserca mas pa haya e informe aki di cuanto persona na Aruba a cay den wega di e Dokter falso aki.

The post Segun Fiscal den Corte un agente Policial tambe a haya tratamento for di e supuesto dokter appeared first on Bon Bini, MasNoticia.

Segun Booshi Wever: “Booshi no ta bay bek MEP”

masnoticia — Thu, 23 May 2013 23:12:50 +0000

Hopi ta e speculacionnan cu Booshi Wever lo ta deliberando pa subi e Barco di Libertad atrobe. Segun Parlamentario Independiente Booshi Wever, esaki no ta berdad. E por a compronde cu lo ta dos diferente hende lo ta scirbi e analisis politico den cierto medionan di comunicacion, pero e ta enfatisa cu esaki no ta berdad.

Cu e lo ta pensando di bolbe MEP, esaki ta puro redo. Loke si Wever ta lamenta ta e comentario di Evelin Wever Croes cu lo tin ex mepistanan cu ta deliberando pa bolbe subi lista. Esaki ta crea speculacionnan inecesario.

UPP ya ta bezig cu nan statuutnan y ta den fase final di e manifiesto. Despues ta trahamento di e programa di partido y puntonan di accion. Awoki ta asercando hendenan pa subi lista y na su debido momento lo anuncia kendenan lo forma e lista.

Por ultimo e Parlamentario a trece dilanti cu si en caso algo mester sosode mes cu e lo no por bai eleccion, e partido si lo sigui dilanti. UPP ta garantia di un gobernacion drechi y transparente unda cu lo enfoka riba arubianisacion.

The post Segun Booshi Wever: “Booshi no ta bay bek MEP” appeared first on Bon Bini, MasNoticia.

Automobilistanan tene cuenta cu desviación di trafico

masnoticia — Thu, 23 May 2013 23:10:56 +0000

ruba Wieler Bond kier a informa tur automobilista pa tene cuenta cu e siguiente informacion: Diasabra 25 di mei, e caminda principal entre e Retonde di Pos Chiquito y e crusada di Mahuma lo wordo sera completamente pa trafico di motor. Esaki ta pa seguridad di e ciclistanan durante e careda cu lo wordo organisa riba e fecha aki. E caminda lo ta sera entre 6:45 am te cu mas tarda 9:30 am.

Usuarionan di bus tambe mester tene cuenta cu esaki.

E crusada di Drive-Inn lo keda habri bou guía di Polis pa automobilistanan cu mester crusa pa e caminda di Sta Cruz. Lo no por bai di drechi ni robes riba e caminda grandi. Aunke cu lo tin guía di polis, nos ta pidi pa preveni usa e caminda aki lo mas posibel pa asina evita congestion na e crusada aki. E crusada di Mahuna lo keda habri, mirando cu lo sera e caminda net prome cu e crusada.

Nos ta pidi tur automobilista pa tene cuenta cu informacion y pa no purba di pasa toch riba e ruta. Lo hasi uso di baricade, pero tambe di voluntarionan pa tene autonan for di e ruta. Boso cooperacion pa sigui e guia di e voluntarionan ta di gran importancia pa e seguridad di e ciclistanan cu lo ta continuamente riba e ruta, coriendo riba velocidadnan hopi halto.

Diadomingo 26 di mei, tambe lo tin un careda di ciclismo den e bario di Sta Cruz. E circuito riba cual e ciclistanan lo pasa varios biaha ta lo siguiente: Start na Urataka Center bai direccion San Fuego. Prome cu e entrada di Parke Arikok lo bira na man drechi direccion Jamanota-Maria Maai, sigui pa Boton, Jan Flemming, Macuarima, y sali bek riba e caminda pa Urataka Center.

Aunke e caminda lo no wordo sera pa trafico, si nos ta pidi pa automobilistanan tene cuenta cu tin un careda andando riba e caminda. E ciclistanan lo ta riba e ruta entre 7:30 y 10:30 am. Un suplica ta bai na tur automobilista pa regula nan velocidad, y ta atento pa ciclistanan riba e ruta.

Tur ciclista merece e oportunidad di por practica nan deporte den un forma sigur y liber di peliger. Tene na cuenta cu lo tin mucha tambe participando na e careda aki.
Aruba Wieler Bond ta gradici tur automobilista di antemano pa nan cooperacion.

Pa mas informacion di e actividad organisa pa AWB, incluyendo informacion di e rutanan y distancianan cu lo wordo cori, por jama na number di telefon 690-0400 of manda un email na arubawielerbond@gmail.com of por bishita e website: www.arubacycling.net

The post Automobilistanan tene cuenta cu desviación di trafico appeared first on Bon Bini, MasNoticia.

8 aña di prison exigi pa dokter falso Jose Rojas cu a mata dama

masnoticia — Thu, 23 May 2013 22:29:10 +0000

Diahuebs atardi, Fiscal, despues di a presenta su rekisitorio pa mas cu un ora, a bisa cu e ta haya cu e sospechoso Jose Gregorio Guaimacuto Rojas culpable di a mata e dama P. riba 21 December 2011. Ademas e ta haya e sospechoso culpable di a falsifica diploma y tambe di a malversa hende door di duna les di estetica.

Fiscal a bisa cu e sospechoso no ta un dokter sino un gran malvesador y cu e sospechoso tabata gaña hende cu e ta dokter y asina hendenan tabata expone nan mes na peliger grandi.

Fiscal a indica cu e peliger grandi ta cu e hendenan cu a laga e sospechoso trata nan, no tabata na altura cu e bio fill gel cu e sospechoso tabata usa, ta sumamente peligroso pa hende. Ademas nan no tabata sa cu e sospechoso ta un dokter falso.

Fiscal a mustra cu a haci investigacion na Venezuela caminda a bay tur e clinicanan y hasta Universidad cu segun e sospechoso, e lo ta traha y studia. A resulta cu ningun cu esakinan ta berdad. Fiscal a haya hopi malo con e sospechoso Jose tabata gaña hende cu carchi di presentacion caminda e ta bisa cu e ta dokter y hasta tin clinica na Venezuela. En realidad e sospechoso ta un asistente di un fysioterapista y no tin e preparacion pa por trata hende y mucho menos di pasa injeccion.

Fiscal ta haya cu intencionalmente e sospechoso a pasa injeccion y asina a mata e dama P. El a exigi 8 aña di prison pa Jose Gregorio Guaimacuto Rojas. Ora Fiscal a exigi e castigo, mama di e victima P. tabata sacudi cabez, mustrando cu e no ta di acuerdo cu e castigo. Fiscal ta spera cu Gobierno lo bay tuma medidanan pa evita cu tipo di cosnan asina lo bolbe pasa. El a señala, con por ta posibel cu un agente di Polis cu a haya tratamento di e sospechoso, nada a pasa cune. Con por ta posibel cu e sospechoso ta drenta Aruba cu un cantidad di productonan cu no ta permiti y Douane no a haci nada. Con por ta posibel cu na un snack por haya pilder di antibiotic pa cumpra. Cu esaki Fiscal a expresa su preocupacion y ta spera cu Gobierno lo duna e atencion necesario.

Pero Hues aki dos siman lo dicta sentencia si lo baha of subi e 8 aña of lo keda cu e peticion di Fiscal.

The post 8 aña di prison exigi pa dokter falso Jose Rojas cu a mata dama appeared first on Bon Bini, MasNoticia.

Caminda di Ecotech riba Dump ta den mal condicion mientras di Serlimar ta den bon condicion nos kier yega na e mes un derechonan

masnoticia — Thu, 23 May 2013 19:52:05 +0000

Presente na Parkietenbos diahuebs merdia Sra. Joanette D.S Vrutaal relaciona cu mercadeo Publico di Ecotech a splica cu nan a presenta den un forma di protesta y a blokia e entrada di Parkietenbos pa tin un oido na Serlimar. Sra. Joanette Vrutaal a comenta cu e problema ta cu par di tempo caba e gerencia di Ecotech a tuma contacto cu gerencia di Serlimar encuanto di e caminda cu e trucknan di Ecotech tin di core bay na e dump cu nan tin riba e dump di Parkietenbos. Joanette Vrutaal a comenta cu e camindanan no ta dje faborabel masha malo pa e trucknan y ta costa Ecotech sumanan grandi mensualmente na e mantencion di e tairanan unda e tairanan ta corta door di e caminda, mientras cu Serlimar su truck mes ta core riba un otro caminda cu ta den bon condicion y no ta dañanan truck manera di Ecotech.

E accion cu e trahadornan di Ecotech a tene un rato Joanette a comenta ta pa yega na mesa cu gerencia di Serlimar lo mas pronto posibel pa por yega na un solucion faborabel y igual pa e trucknan di Ecotech. Sra. Joanette a comenta cu Ecotech ta paga pa cada ton cu nan ta dump na Parkietenbos y cual Serlimar ta hayando basta placa pa luna

The post Caminda di Ecotech riba Dump ta den mal condicion mientras di Serlimar ta den bon condicion nos kier yega na e mes un derechonan appeared first on Bon Bini, MasNoticia.

Piedra Plat Entertainment Center cu vlooienmark diadomingo awor

masnoticia — Thu, 23 May 2013 19:26:00 +0000

Piedra Plat Entertainment Center (PPEC)kier a invita pueblo di Aruba pa un tremendo vlooienmark Diadomingo 2 di Juni 9:30am-5:30pm Lo tin 30 tent cu differente articulonan na benta y tambe tent nan cu cuminda nan sabroso. Tambe differente actvidad nan pa nos muchanan bini den famia y asina probecha di e tremendo dia aki.
Si tin algun pregunta por tuma contacto cu Sra Ruth de Cuba 6622970 of manda un email : ppecaruba@hotmail.com.

The post Piedra Plat Entertainment Center cu vlooienmark diadomingo awor appeared first on Bon Bini, MasNoticia.

Desconocir kier a agredi y asalta turista pafo di gusto

masnoticia — Thu, 23 May 2013 19:23:46 +0000

Diahuebs marduga pafo di e Club Nocturno Gusto cu ta situa na South Beach a surgi un problema ora cu mas di 2 persona desconoci y cu arma blanco den nan poder a purba na agredi y asalta un turista.Nan a purba na ranca pertenencia di e turistanan pero e malechornan a haya un bati di nan bida y algun a core bay direccion noord y otro a bay direccion zuid. Polisnan a yega di biaha papia cu e victima y otro patruyanan a busca rond den bisindario si por a topa cu e malechornan.

The post Desconocir kier a agredi y asalta turista pafo di gusto appeared first on Bon Bini, MasNoticia.

Booshi Wever: Hypocrecia di marca mayor di Otmar Oduber: Prome “ Horta ta Horta” y awor: Bon BINI Back?

masnoticia — Thu, 23 May 2013 19:17:26 +0000

Den mi comunicado di dia 11 di februari ultimo, mi a mustra riba e “straño” di e retironan na Arubus, cu lo mester a cay pa Otmar por a acomoda su hendenan na dicho compania.Mi a mustra ademas riba e motibonan pakiko na mi parecer director di Arubus no tabatin ningun base pa a retira e mas di 20 chauffeurnan, pero cu
e mester a haci esaki pa complace cu Otmar, habriendo caminda pa esaki acomoda su campañador- y sostenedornan, y asina tambe comete abuso di poder door di persigui empleadonan.
Mi a wordo tilda di ta defende ladronnan, no obstante cu mi a mustra riba e mal funcionamento di aparatonan, cu tabatin e descrepancianan como consecuencia..
Mi a expresa di ta spera cu Huez lo a yega na un veredicto HUSTO den e asunto aki.

Nos ta corda cu cuanto fervor y enfasis Otmar a defende e retiro masal, basando su mes riba su principio “horta ta horta”, sin considera sinembargo ningun aspecto cu a hunga un rol den e asunto aki, pero tampoco considerando e banda humanitario, esta e situacion cu e chauffeurnan victima lo a hayanan mes aden ora cu nan lo a bay keda sin entrada!

Contrario na e veredicto, Otmar ta haci manera cu ta E, hunto cu e comisarionan di Arubus, ta bay permiti e chauffeurnan bolbe na trabao! Palabranan di Otmar cu esaki ta proba cu e retironan NO tabata pa motibonan politico (pa e acomoda su campañadornan), NO ta cuadra cu su intencion di lo a bay den un “bodem procedure” contra e chauffeurnan.
Y cu Otmar lo no (kier) mete den e maneho diario di Arubus, lo nos tuma “met een korreltje zout”; den otro palabra: “Otmar, a otro perro con ese hueso!”
Finalmente, lo ta na su lugar pa tanto Otmar como e Hunta di Comisario, y e director di Arubus, weitando e veredicto, publicamente pidi un disculpa na e chauffeurnan pa e ofensa di a comparanan cu ladron, tene honor na nan mes y entrega nan retiro!

The post Booshi Wever: Hypocrecia di marca mayor di Otmar Oduber: Prome “ Horta ta Horta” y awor: Bon BINI Back? appeared first on Bon Bini, MasNoticia.

Mas di 6 mil dollar a somenta for di caha fuerte despues di un kiebro

masnoticia — Thu, 23 May 2013 19:08:59 +0000

Diahuebs mainta e persona encarga cu Tierra del sol su Golf Course su oficina a yega trabou y topa cu un sorpresa unda antisocialnan a kibra drenta via dak y horta. Di biaha e personal a core bay na e caha fuerte unda ta warda e placanan pa deposita y constata cu antisocialnan a forsa esaki te kibra y bay cu e placa cu tabatin. Polis di Noord tambe a presenta na e sitio y a tuma declaracion di e persona encarga y a constata cu berdad antisocialnan den oranan di marduga a drenta via dak kibra esaki y cu nan trankilidad a kibra e safe y bay cu e placa. No ta prome biaha caba cu ta horta na e lugar aki pero cantidad di biaha. Polis a traha rapport y esaki lo bay den man di recherche pa haci su investigacion.

The post Mas di 6 mil dollar a somenta for di caha fuerte despues di un kiebro appeared first on Bon Bini, MasNoticia.

Resultado di Weganan di Number Merdia 23 Mei 2013

masnoticia — Thu, 23 May 2013 18:55:20 +0000

Lotto Cambiando bida ta presenta e resultadonan di Wega di Number 23 Mei 2013 y subi website di Lotto riba www.lottoaruba.com Si bo kier e resultadonan den bo Celular sms e palabra Sorteo On pa 1100.

Catochi
1. 0097
2. 2894
3. 4479

Big 4
1. 0564

Zodiac
1. 3588 Aries

The post Resultado di Weganan di Number Merdia 23 Mei 2013 appeared first on Bon Bini, MasNoticia.

Trucknan di Ecotech a blokia entrada di Dump pa malcontento

masnoticia — Thu, 23 May 2013 18:29:07 +0000

Diahuebs merdia na entrada di Dump tabata bloki pa 30 pa 45 minuut te ora cu autoridadnan a yega pa motibo cu tabatin un disgusto cerca e personalnan di Ecotech y un intercambio cu e personalnan di Dump cu ta traha pa Serlimar. Manera ta conoci cu e tereno di Dump tin dos caminda uno pa companianan priva y e otro pa Serlimar su trucknan so. Informe cu nos a ricibi cu pa algun tempo caba trucknan di companianan priva ta core den un caminda mal estado unda tairanan ta bora door di clabo y of kap mientras cu trucknan di Serlimar ta core riba un caminda den bon condicion. Mientras hopi di e trucknan priva cu ta bin tira sushi riba e tereno di dump ta pagando hopi placa na ton y pa nan haya e servicio malo aki. Na e sitio nos a compronde cu tur cos a cuminsa ora cu dos truck di Ecotech a keda blokia pa e personalnan di Serlimar y aki e otro coleganan hunto cu hefenan a yega na Ecotech pa wak e situacion y aki e coleganan a cera entrada unda ningun hende ta drenta of sali for di dump. Te ora cu autoridad a yega y trankilisa e situacion.

The post Trucknan di Ecotech a blokia entrada di Dump pa malcontento appeared first on Bon Bini, MasNoticia.

Brazil Taekwondo Stichting su team di “Train Hard Fight Smart” a train na Grape Field den preparacion pa Suriname

masnoticia — Thu, 23 May 2013 18:25:29 +0000

Diamars atardi e team di Brazil Taekwondo Stichting cualnan ta preparando pa Suriname a train na Grape Field cu e meta di ta bon prepara pa Suriname. E team di Train Hard Fight Smart ta train hopi duro pa asina enfrenta ken cu ta na Suriname. E team di Brazil Taekwondo Stichting sa kiko tin di speranan na Suriname y ta biahando cu e A, B, y C team. Un team mixto pa e Open di Suriname.

Na e ultimo campeonato na luna di Januari e team di Brazil Taekwondo Stichting a suta Suriname y Frans Guyana na e Team Championship di 9-12 anja y asina aki Brazil Taekwondo Stichting a gana for di tur 3 team na Suriname. Pero awor Brazil Taekwondo Stichting ta bayendo cu 8 atleta mixto di cada divicion y ta pone cu mester train tur e atletanan aki bon. Alberto Klabér kende tin varios strategia pa su team ta pone esaki como un prioridad pa e atletanan. E piek cu Alberto Klabér tin pa su team ta Mexico na unda cu Brazil Taekwondo Stichting ta bay participa na e Panamerican Open cu e meta di gana medaya na e Panamerican Open aki.

Na cada campeonato ariba su mes ta evalua e atletanan pa asina nan ta mas y mas mihor prepara pa Mexico. Despues di e Open di Suriname na luna di Juni, Brazil Taekwondo Stichting ta bay pa e Open di Venezuela na luna di Juli.

E lema di Brazil Taekwondo Stichting “Train Hard Fight Smart” tin su motibonan y sa demonstra esakinan cu hechonan.

The post Brazil Taekwondo Stichting su team di “Train Hard Fight Smart” a train na Grape Field den preparacion pa Suriname appeared first on Bon Bini, MasNoticia.

Garnier cu otro exitoso Beach Clean up

masnoticia — Thu, 23 May 2013 16:24:12 +0000

Diadomingo 19 di mei ultimo, ya for di 6.30 di mainta, por a wak movecion riba e beach di Grapefield, unda mas di 600 boluntario a uni y mustra e amor pa nos isla. A recoge un cantidad record di 110yrd di sushi. E area di Grapefield a wordo parti entre e diferente gruponan presente. A cubri un total di 4 km di beach, cuminsando for di Bachelor’s Beach te na Rincon. Esaki ta di tres aña cu Garnier ta organisa e beach clean up aki y señora Lizayra Tromp-Polak, Sales and Marketing Manager di Medicosmetics Aruba N.V. ta amplia: “Garnier tin como slogan Take Care. E ta un linea cu ta kere den beyeza natural y cu ta cuida esaki den tur sentido di e palabra. No solamente Garnier ta cuida abo, sino otro tambe, nos comunidad en general y nos medio ambiente. Nos a lanza e actividad aki na 2011 y orguyosamente nos por bisa, cu tur aña nos ta crece den cantidad di boluntario y den cantidad di sushi recogi. E aña aki Garnier a uni hunto cu Focus Aruba, GLW Foundation y Zoomaruba.com pa duna e proyecto aki mas forza. Garnier ta tuma e oportunidad aki pa gradici tur e gruponan cu a haci e dia aki uno exitoso: DHL, Grupo Nos cu Nos, Valero, Lady Olave Baden Powell Group, JCI Yala, Medicosmetics Aruba N.V., Masnotica.com, GLW Foundation, Candidatanan di Miss Teen Internacional 2013: Genoveva Brown, Chysah Verstappen, Stephanie De Andrade, Giandra Rasmijn, Geraldine Vidal y Delany de Nobrega, Turtugaruba, La Cabana, Johnson’s Enterprises, Sra Angela Marilia, Sra Iris, Focus Aruba, 2Bfit, Arubaanse Voetbal Bond, Srta Aruba, Parlamentario Sr. Juan David Yrausquin, Presidente di Staten Sr. Paul Croes, Parlamentario Sr. Donny Ramijn, Parlamentario Sr. Andin Bikker y oficina di abogado Lopez Law. Un danki special na e siguiente companianan/personanan cu a haci e evento aki posibel: George Cycle rental, Panaderia Moderna, Tropical Bottling cu marca Awa, Johnson’s Enterprises, Rode Kruis y e team dinamico di Zoomaruba.com. Aunke nos a pasa 600 boluntario, nos mester mas man ainda pa por cubri full e area”. Garnier ta suplica un y tur pa yuda mantene nos isla limpi y ta pidi pa sigui cumpra Garnier Fructis y asina aporta na cuido di nos turtuganan. Garnier kier a gradici tur e 600 boluntarionan pa por a haci e evento aki uno exitoso.

The post Garnier cu otro exitoso Beach Clean up appeared first on Bon Bini, MasNoticia.

Desconocir a kibra den van staciona den parkeerplaats di Douanne Kantoor

masnoticia — Thu, 23 May 2013 16:05:36 +0000

Diahuebs marduga doño di un hyundai van shinishi a yega na su auto y topa cu e bentana banda di chauffeur kibra. E doño di biaha a yama Polis raporta e kiebro aki na su auto y a bay warda pa asina duna un keho oficial di locual cu a keda horta.

The post Desconocir a kibra den van staciona den parkeerplaats di Douanne Kantoor appeared first on Bon Bini, MasNoticia.

Marisol Lopez Tromp: Destruccion di placa di Pueblo: Pa capricho di un director Centro di Cuido ta keda tres aña para por nada?

masnoticia — Thu, 23 May 2013 16:02:36 +0000

Gobierno a anuncia cu nan lo bai traha un internado pa vang op esnan multiple handicap den nos comunidad. Segun Parlamentario independiente Marisol Lopez Tromp, esaki riba su mes ta algo hopi bon y ta un necesidad. T’asina cu durante e tempo cu e tabata Minister di Asuntonan Social a hinca hopi tempo y energia pa basta aña largo pa bin cu un centro di cuido na San Nicolas, no solamente pa nos grandinan pero tambe cu un seccion aparta pa esnan cu multiple handicap. Awe e centro di cuida aki ta existi y a keda mas o menso 3 aña pasa despues di como 8 aña di preparacion y ta situa na Palisiaweg. Aki nos grandinan ta biba den un centro moderno cu ta unico den su forma den Caribe y ta bou maneho di SABA, cu ta e instancia cu ta percura pa nos grandinan.

E tempo ey e intencion tabata pa un parti di e compleho aki wordo destina y uza tambe pa esnan cu ta multiple handicap den nos comunidad. Aworaki casi 4 aña despues di e Gobernacion di AVP por a mira e anuncio den corant caminda cu ta duna di conoce cu ta bai construi na e momentonan aki un internado nobo cu ta bai vang op 24 ora pa dia esnan cu tin un multiple handicap. Esaki enberdad ta un necesidad, pero Parlamentario Lopez Tromp ta puntra pakico a laga como 3 aña largo e centro cu tin na San Nicolas cu full e seccion cu infrastructuralmente ta cla pa vang op esnan multiple handicap, para bashi sin haci uzo di dje.

T’asina cu un comision social di Parlamento a haci un bishita na e Centro di Cuido na Palisiaweg aña pasa y por a tuma nota cu e centro ta casi full den uzo cu excepcion di e parti cu ta dedica na e personanan cu multiple handicap. Pa splica un tiki mas, esaki no ta ensera solamente e kambernan of bañonan of lugarnan cu esnan multiple handicap lo por biba y wordo guia, pero e ta ensera tambe un lugar caminda e pensamento tabata pa comparti e facilidad entre nos grandinan y esnan cu multiple handicap unda cu nan por uza e mesun cushina, laundry etc pa scapa gasto y alabes esaki ta mas funcional tambe.

Tambe Parlamentario Lopez Tromp a comenta riba e echo cu Gobierno ta aunucia cu nan ta bai nombra mas cu 30 profesional pa yuda esnan cu multiple handicap no solamernte cu cuido pero tambe pa haci nan bida mas agradabel y optimal. E pregunta cu e Parlamentario tin e ora ta pakico Gobierno lo haci un ‘kapitaalsvernietiging”, den e caso aki laga e lugar para tres aña y pico bashi para caminda cu asta tin un piscina terapeutico, tin un espacio pa terapia y asta tin schommel y recreacion pa hobennan cu lo por haci uzo di e facilidad aki; tur esaki a keda para pa añanan. Awor Gobierno ta papia di construi un lugar nobo. E Parlamentario no tin nada contra di e facilidad aki ya cu e ta un necesidad na Aruba, pero e ta puntra su mes si acaso Gobierno a doblega pa capricho di un of mas persona cu di e tempo aya caba no tabata kisas duna full e cooperacion necesario pa asina e centro por bin conhuntamente.

Bo por tin un diferencia di pensamento y kier haci esaki di un forma diferente, pero echo ta cu e lugar ta existi, e infrastrucutra ta cla y e placa a wordo inverti, cual tabata miyones di placa di pueblo. A dura añanan pa prepara e plan aki unda a traha hunto cu diferente instancia manera SABA, SVGA y cantidad di otro expertonan di otro departamentonan unda a prepara intensamente no solamente pa e ehecucion di e proyecto infrastructuralmente, pero tambe kico e ta bai nifica pa nos grandinan y tambe esnan cu multiple handicap.

Parlamentario Marisol Lopez Tromp a bisa cu su preguntra specificamente na Gobierno ta kico ta bai sosode cu e parti di Centro di Cuido pa nos grandinan na Palisiaweg na San Nicolas. E pensamento ta pa lag’e keda para bashi? Desde cu el a wordo construi el a keda cla y a ta un lugar unico riba su mes destina pa esnan cu handicap. A caso e pensamento ta pa pone nos grandinan den e parti cu ta bashi cu tabata destina pa esnan cu un handicap? Si esaki tabata e caso, nos grandinan por a drenta for di tres aña pasa caba ya cu e lugar a keda tur e añanan aki bashi sin wordo uza.

E otro pregunta ta cu si tin un necesidad di mas cu 30 persona profesional y capacita pa bai haci e trabou aki den un internado, por a haci esaki mescos den e Centro pa Cuido na San Nicolas. No necesariamente mester traha un edificio full di nobo atrobe na un otro locacion cu tambe cu lo mester ubica den nos presupuesto di Aruba. Realisticamente mester tene cuenta cu construccion di un edificio asina lo no bai keda cla den un par di luna manera cu nan ta premira paso e ta un tipo di contruccion special cu ta netamente dedica pa esnan multiple handicap. Hopi biaha mester di material special y tambe specialistanan riba e tereno aki.

Parlamentario Marisol Lopez Tromp kier sa kico ta Gobierno su vision pa e parti na San Nicolas cu te awe no ta wordo uza optimalmente y cu ta dedica na esnan multiple handicap y cu tin 3 aña para bashi sin wordo uza? Ken ta bai haci uzo di e facilidadnan aki cu a costa miyones di placa di pueblo? Y si Gobierno ta bisa cu ta destin’e pa nos grandinan, pakico no a uz’e anto den e 3 añanan tras di lomba como debe ser?

The post Marisol Lopez Tromp: Destruccion di placa di Pueblo: Pa capricho di un director Centro di Cuido ta keda tres aña para por nada? appeared first on Bon Bini, MasNoticia.

Maria. R. Boekhoudt van den Ham: UPP ta e unico partido cu si tin e intencion serio pa haci e cambionan necesario den e maneho di stranheria pa hacie un maneho estrito pero husto

masnoticia — Thu, 23 May 2013 16:00:14 +0000

Riba 20 di mei pasa nos por a lesa den e editorial di Diario den cual e editor a menciona cu e Aruba cu nos conoce, unda nos a crece y a pasa mayor parti di nos bida, ta bayendo sin cu nos por detene su transformacion, sin e apoyo di un Gobierno decidido pa conserva su tradicionnan. Tambe e la menciona cu e tabla di relacion entre nos y e stranheronan a cambia considerablemente door di e oleada di imigracion, tanto asina cu e no ta temerario bisa cu nan por a bira, den number mas cu nos.

Maske tur otro partido a evita e topico aki, UPP SI a tuma un posicion clave y firme pa informa y educa pueblo na varios ocasionan caba di tur e consecuencianan di un maneho di stranheria cu no ta wordu hiba na interes general di e cuidadanonan na Aruba.

UPP kier enfatisa aki cu su maneho di stranheria SI lo ta na bienestar di Aruba y e pueblo, tanto pa esnan cu a nace aki y tin raiznan di generacionnan, pero tambe como esnan no naci aki na Aruba, pero a scohe Aruba como nan hogar pa biba y traha. E maneho cu UPP ta propone ta un maneho ‘tough but fair’. Nos mester realisa cu Aruba ta full y cu nos capacidad di carga a yega su limite. Mientras cu e crisis mundial ta imperativo pa nos cuida nos frontera den e temponan dificil aki.
Banda di esey nos ta di opinion cu pa evita cu e Aruba cu nos tur conoce bai perdi, lo ta crucial pa, banda di e cambionan den e maneho di stranheria, implementa tambe cambionan necesario den e maneho cultural y e maneho di integracion.

Maneho cultural

E maneho cultural di Aruba mester ta basa riba promocion di cultura di Aruba den tur sentido di palabra, pa por logra un re-Arubianisacion di nos pais. Esaki mester ta na nivel gubernamental como instrumento pa yuda tur esnan cu ta ocupa nan mes cu esaki riba e otro terenonan.

UPP ta partidario pa banda di papiamento, cultura bira parti di nos curiculo escolar ya caba for di nivel basico di nos enseñanza. Conocemento di nos cultura mester wordo inculca for di edad hoben. Esaki ta e garantia cu nos por yega un dia tambe na integracion.

Tambe expresionnan cultural existente mester haya mas atencion y sosten for di gobierno. Asina nos por menciona p.e. Dande y San Juan. Tambe lo fortifica e institutonan cultural manera un Fundacion Desaroyo Educativo y Comunitario (FDEC) pa asina sigui trece cultura mas cerca particularmente nos hoben. Asina tambe nos ta kere cu parti di nos tradicionnan immaterial, manera piscamento, cultivacion y cria lo mester wordo stimula. Na su turno esaki lo por tin efecto positivo riba area productivo economico y alimentacion di nos pueblo.

Importante tambe ta cu den e cuadro aki mas investigacion wordo haci riba nos cultura, historia y custumbernan. Conocemento sigur ta di importancia pa loke ta concerni e proceso pa re-Arubianisacion y creacion di un nacion cu curazon, esta un Patria.
Instancianan gubernamental cu tin di haber cu cultura y historia di nos pais mester haya e atencion y sosten necesario pa por cumpli nan metanan. Fortificacion di nos cultura ta bai man den man cu e fortificacion di nos institutonan.
Banda di e parti immaterial atencion lo wordo duna tambe na e parti material di nos herencia cultural. Di e manera aki ta conserva tanto e memoria y parti di antaño como muestra di nos existencia den e mundo aki.

Maneho di Integracion

Den e cuadro di re-Arubianisacion, ta importante pa e maneho di integracion realmente haya su lugar. Integracion no ta nifica pa UPP djis tolera e comunidadnan nobo cu a bin establece nan mes na Aruba. Na lugar di multiculturalidad mester bai traha na interculturalidad. Si nos kier papia di un integracion real, esaki mester bai cu respet pa e cultura di nos hendenan nobo. Pero e respet aki mester ta mutuo na unda cu nos como Arubiano ta acepta y reconoce cu nos tin ciudadanonan nobo cu ta stima e pais y ta decidido pa duna un aporte na Aruba. Mientras nos Arubianonan nobo tambe mester acepta cu nan tin di mira nos cultura, nos norma y balornan, nos idioma Papiamento como e forza catalysador pa asina ey integracion por tuma lugar.

Pa por logra esaki ta necesario pa esnan cu ta scohe pa bin biba largo na Aruba y cu pa por haya permiso, mester pasa cierto testnan riba tereno di nos cultura, historia y papiamento, mientras cu nan yiunan via di e sistema di enseñanza mester percura pa e assimilacion necesario.

Den e articulo aki nos a menciona ki cambionan UPP lo trece den e maneho di Stranheria, y con en relacion cu e maneho aki e maneho Cultural y e maneho di Integracion lo mester wordu cambia.

Den nos siguiente articulo den e mesun cuadro di UPPgrading di Nos Patria Aruba nos lo informa y educa pueblo over di nos plan pa combati corupcion.

Nos ta invita un y tur pa manda nan comentarionan y sugerencianan pa nos email: uppprogresopaaruba@gmail.com of bishita y like nos page UPP Union Patriotico Progresista riba Facebook.

The post Maria. R. Boekhoudt van den Ham: UPP ta e unico partido cu si tin e intencion serio pa haci e cambionan necesario den e maneho di stranheria pa hacie un maneho estrito pero husto appeared first on Bon Bini, MasNoticia.

We Love Students ta den full preparacion cu nan evento funstacle masters pa dia 8 di Juni

masnoticia — Thu, 23 May 2013 15:58:23 +0000

Manera ja comunidad di Aruba sa of a tende y mira den nos medio nan di comunicacion, We Love Students (WLS) ta den ful preparacion pa sera Aruba conoci cu nan y alabes tambe preparando pa nan caminata di 5km dia 8 di juni 2013. E caminata aki ta bay ta uno totalmente diferente na tur caminata cu nos conoce aki na Aruba. Lo bo bay encontra diferente obstaculo riba caminda p.e., baki nan di Ecotech Aruba, bloki y santo di Atco Concrete Products, y truck nan etc. Den salinja lo bay tin grupo di Marinierskazerne/ Arumil, unda lo bay susha curpa un tiki asina cu lodo y tambe “The great wall of Local Store”, Power fm 101.7 cu lo bin cu nan power “dumbbell” y asina hopi mas di tur nos partner y sponsor nan. Den e ultimo dianan WLS cu sosten di Fundacion Autismo Aruba, a cuminsa “shop” pa algun obstaculo di nan partner/sponsor nan cu lo wordo usa riba caminda dia di Funstacle Masters, manera ja a menciona un par di e obstaculonan. Riba e potret nan por mira cu ja e FUN a cuminsa pa e organisadornan y nan ta ful entusiasma pa e gran dia yega pa asina comunidad di Aruba tambe por experencia e idea maximo tras di Funstacle Masters cu ta e parti di teamwork y naturamente pasa pret, pesey e nomber “FUNSTACLE MASTERS, EITHER YOU MASTER THE FUN OR THE OBSTACLES”. No kier divulga tur e obstaculo nan ja cu nan kier laga algun sorpresa pa tur participante. Tur obstaculo lo ta apto pa tur cu participa y bo no mester ta un super atleta pa por “master” e obstaculonan.
Ta invita tur compania, tur organisacion di deporte sea ta futbol, basket, grupo nan di “bikers”, “racing teams” , banconan, hotelnan, traha boso grupo di 5 y join nos dia 8 di Juni na Fisherman’s hut y bin pasa un dia super FUN cuminsado for di 1or di merdia y pa 3or lo ranka Sali cu Funstacle Masters. Power fm lo ta transmitiendo live “Power 40 hits” di siman cu Ivan Keli Jr. y asina tambe entretene tur presente cu ta preparando pa e tremendo caminata. Un “caminata” totalmente diferente unda cu bo por sea core of cana, individual of cu bo grupo di 5 amigonan, coleganan di trabou y of famianan. Grupo di 5 lo ta 100 florin y individual lo ta 25 florin y e ta 18 anja bay ariba. Bo lo ricibi un great rubber wristband cu e logo di Funstacle Masters 2013 y esaki lo keda como recuerdo cu a participa. Funstacle Masters ta priminti di ta anualmente y asina sigui yuda instancianan cu tin e nesecidad financiero y cu no ta wordo subsidia. Y esey ta un di e motibo nan pakiko WLS a escoge FAA e anja aki pa ta e beneficiario di nan evento. No precupa paso Tropical botling company lo percura pa tur participante keda bon hydrata cu AWA. Bo no mester ta un atleta pa por domina tur esaki, sino e lo ta apto pa un y tur. E idea di Funstacle Masters ta pa focus riba teamwork y dimes FUN, y tambe alaves yuda recuado fondo pa FAA. Por inscribi na tur sucursal di Atco Concrete products y tambe Ecotech Aruba, tambe na Fundacion Autismo Aruba y We Love Students. E no ta un competencia pero si nos lo tin diferente premio pa e grupo mas great bisti y creativo y tambe mas energetico y tambe pa individual. Durante y despues di e “obstacle run/walk” lo tin entretenimiento di diferente banda local y tambe dj pa asina sigui cu e ambiente great pa tur cu a participa como tambe publico en general. Keda pendiente pa e powerful local line up cu Funstacle Masters lo annuncia den transcurso di siman. Chichi’s snacks tambe lo tey cu nan tremendo plato/pasa boca nan pa duna tur participante energia bek pa por sigui disfruta di e “after party/event” di Funstacle masters!! Si bo no por participa y kier yuda como voluntario, por tuma contacto na e sigiente numbernan 5680656 y 5881179 of via e-mail jchiquito@welovestudents.org. Tambe pa mas informacion por bishita nos pagina web www.welovestudents.org of pagina di facebook www.facebook.com/welovestudentsorg . Un biaha mas nos kier gradici tur nos partners y sponsors cu a apoya Funstacle Masters sin duda algun,: ATCO CONCRETE PRODUCTS, ECOTECH ARUBA, POWER FM 101.7, LOCAL STORE ARUBA, CMB N.V., ODUBROS, ANDINA ICE, SETAR N.V., ELITE, ARUMIL, DAC IMAGE, 279 HOSTING, AWA, BALASHI CHILL, ZENITEL, CHICHI’S SNACK, D.O.W., BRANDWEER, KORPS POLITIE ARUBA, ALBO ARUBA, ARUBAANSE WEGENBOUW, KITE SURFING ARUBA, CILO CITY LOUNCH, TASTE OF BELGIUM, PAPILLON RESTAURANT, THE CINEMAS, BIRKENSTOCK FOOTFIT, YOUNG INTERPRENEURS STICHTING.
We Love Students kier invita ful e pueblo di Aruba pa participa of bin apoya e participantenan y goza di e bon entretenimiento.

The post We Love Students ta den full preparacion cu nan evento funstacle masters pa dia 8 di Juni appeared first on Bon Bini, MasNoticia.

Chauffeur di pickup a perde control dal contra palo di luz

masnoticia — Thu, 23 May 2013 15:16:22 +0000

Diahuebs marduga na e crusada di Mahuma un accidente a tuma lugar ora cu un chauffeur di un pickup s-10 biniendo for di pariba a perde control pa un of otro motibo E perdemento di control a haci cu consecuencia cu e la dal contra e isleta unda e palo di luz ta dal esaki y banda di chauffeur a dal contra e palo di lus. E chauffeur mes a sali ileso y no tabata sinti nada ni herida pero tog ambulance a presenta y controle y dune conseho si e sinti dolor pa pasa su dokter di cas. Polisnan tambe a yega y traha rapport di e sucedido e auto mes a haya basta daño material.

The post Chauffeur di pickup a perde control dal contra palo di luz appeared first on Bon Bini, MasNoticia.

Minister di Turismo, Transporte y Labor: Ta para tras di e decision pa tuma chaufferunan bek den servicio

masnoticia — Thu, 23 May 2013 15:03:45 +0000

Den cuadro di e resultado di e dos caso di chauffernan di Arubus, Minister di Transporte Otmar Oduber a duna di conoce cu e ultimo decision cu huez a tuma ta indica cu Arubus mester tuma e 4 chauffeurnan aki bek na trabou. Manera ta conoci algun luna pasa Management di Arubus como tambe Hunta di Comisario a despedi un grupo di chauffeur di Arubus pa motibo di asuntonan iregular cu tabata tumando lugar e tempo ey.
E mandatario ta indica cu como Gobierno “bo no kier entremete den e maneho diario di Arubus y ta duna e espacio necesario pa haci loke nan ta kere ta corecto.” Como Minister di Transporte y accionista di Arubus naturalmente e mandatario no por permeti pa casonan cu no ta corecto tuma lugar.
E derecho di e trahadornan ta pa por a bay corte, caminda cu den un kortgeding dos diferente grupo a haya sentencia unda cu huez a stipula cu ambos grupo mester continua cu nan salario.
Arubus cu Hunta di Comisario tabatin e intencion pa bay un bodem procedure unda nan lo haya mas tempo pa por mustra kico ta loke a susode cu ta iregular den e situacion aki.
Pues mirando e ultimo sentencia cu tabatin, y mirando cu si bay den un bodem procedure esaki kiermen cu e proceso aki lo dura un 6 pa 9 luna mas y manera a wordo informa esaki lo trece cu ne sumananan halto di costonan adicional pa Arubus cu lo por yega te na 400 mil florin, Minister di Transporte y Labor conhuntamente cu Hunta di Comisario a tuma e decision pa permiti e 15 chauffeurnan aki pa regresa na pia di trabou. Mirando e situacion financiero di Arubus no ta responsabel keda paga e chauffeurnan aki pa keda cas.
Minister di Transporte y Labor Otmar Oduber ta para tras di e decision aki, pasobra si un persona a hiba e caso corte y a resulta cu el a haya su derecho, no tin ningun motibo pa sigui molestia un hende asina. Esaki lo por perhudica e compania mas ainda si sigui den e direccion aki.
Cu esaki Miniser Oduber ta demostra un bes mas cu na ningun momento Arubus a retira empleado cu un meta politico manera a wordo treci dilanti, unda cu oposicion ta indica cu e sucedidio ta algo politico pa por nombra otro hende nan pa cu e posicionan aki. E mandatario a sigura cu ningun hende no a wordo nombra den periodo aki y cu ta algun perosna a wordo tuma pa duna servicio temporal. Hecho ta na ningun momento e decision tabata pa kita hende di trabou pa nombra otro hendenan. Minister Otmar Oduber ta para tras di e decision cu ta tene e bienestar di empresa na cuenta.

The post Minister di Turismo, Transporte y Labor: Ta para tras di e decision pa tuma chaufferunan bek den servicio appeared first on Bon Bini, MasNoticia.

Ciudadanonan a sorprende Minister Benny Sevinger cu muestra di sosten y aprecio

masnoticia — Thu, 23 May 2013 15:01:18 +0000

Di un manera informal, pero sigur sincero un grupo grandi di ciudadanonan ‘Perubiano’ a sorprende Minister Benny Sevinger diadomingo ultimo durante su participacion den un programa di radio. E Minister di Integracion, Infrastructura y Medio Ambiente tabata invitado special na e programa ‘Colonia Peruano’ cu ta wordo transmiti pa medio di e emisora Hit 94 FM.
Compaña pa su Asesor di Poliza riba Asuntonan di Integracion, Sr. Radi Abdoel-Khan, Minister Sevinger a combersa cu presentador di e programa, Sr. Fernando Villacin, riba e maneho di gobierno riba admision y integracion di ciudadanonan stranhero, pero tambe riba e diferente proyectonan cu ta ehecutando na nivel nacional.
Mientras cu un cantidad enorme di yamada tabata drenta na estudio, pafo di sede di e emisora na Ponton, simpatizantenan di Minister Sevinger y di partido AVP tabata aglomerando pa expresa di manera espontaneo nan sosten na e maneho y vision di e Minister y di Gobierno. Baby, mucha, hoben y adulto bisti den nan t-shirt ‘Bon Trabou…Ainda Falta’ a cuminda, combersa, felicita y tambe saca potret cu Minister Sevinger.
E manifestacion casual aki di apoyo y cariño cu e mandatario a ricibi no ta nada otro cu e resultado di un gestion cu a compronde precies loke e pueblo tabatin mester y tabata pidi p’e. Minister Sevinger como titular di Integracion a sa di demostra cu tin semper un manera adecua di anda cu hende, cu hende nan bida y nan futuro; un manera mas organisa y husto, pero tambe mas humano y respetuoso. E aceptacion y aprobacion pa su maneho di parti di e comunidad di origen Peruano, ta uno cu otro colonianan ta comparti sea ta Latino, Europeo of tambe Caribense.
Pa loke ta trata Infrastructura, Minister Sevinger tin cuater aña, y te hasta prome cu esey, trahando duro riba un vision cu henter gobierno y partido AVP ta comparti. E vision ey ta pa brinda e ciudadano Arubiano, sin distincion di nacionalidad, entrada of afiliacion politico, un bario digno pa biba aden y mas ainda un bario caminda tur hende ta mas cerca di otro y ta goza di tur e facilidadnan pa un miho calidad di bida, miho formacion familiar y miho sinti di comunidad.
Minister Sevinger a keda masha complace pa e muestra di aprecio cu el a ricibi diadomingo ultimo den loke e tabata mira djis un compromiso mas di trabou, esta di informa pueblo, pero cu a comberti den un ocasion masha agradabel caminda cu e por a comparti idea y pensamento cu e ciudadanonan di origen Peruano riba nos isla.

The post Ciudadanonan a sorprende Minister Benny Sevinger cu muestra di sosten y aprecio appeared first on Bon Bini, MasNoticia.

Tiara Air Aruba cu special riba su vuelonan directo

masnoticia — Thu, 23 May 2013 14:58:58 +0000

Tiara Air Aruba kier a informa cu cumpra bo pasashi prome cu dia 30 di Juni y biaha te cu 22 di Juli 2013. Esaki ta relaciona cu diferente specialnan pa diferente destinacionnan.

Special cu vuelo directo pa

Bonaire AWG 300.17

Curacao AWG 295.65

Las Piedras AWG 405.63*

Maracaibo AWG 518.17

Caracas AWG 551.99

Fort Lauderdale AWG 603.72

Riohacha AWG 475.65*

Cumpra bo pasashi prome cu dia 30 di Juni y biaha te cu 22 di Juli 2013.

*Tax di Venezuela no ta inclui

*Miembro di Pricesmart ta ricibi 5% di descuento.

Pa mas informacion yama 5284272 of 5834307

The post Tiara Air Aruba cu special riba su vuelonan directo appeared first on Bon Bini, MasNoticia.

Parlamentario Arondino Croes: E Gobierno aki no tin nos grandinan na pecho

masnoticia — Thu, 23 May 2013 14:56:12 +0000

For di 3 di Mei cu nos pensionadonan mester a cobra nan pension ainda tin di nan cu no haya esaki pa cual esaki ta un problema grandi pa nos grandinan segun Arondino Croes, parlamentario di MEP. Arondino no ta compronde con Gobierno ta gasta placa pa loco , mientras cu e pensionadonan tin cu mendiga pa nan entrada. Esaki ta inacceptabel, ya cu fayonan por sosode, pero no por ta asina cu hendenan tin 3 siman ta warda y no a haya nan placa complete. AVP a bisa cu lo pone atencion na nos grandinan pero no ta notando nada di esaki. Parlamentario Croes ta condena e echo aki y ta spera cu lo pone mas atencion na nos pensionadonan.

The post Parlamentario Arondino Croes: E Gobierno aki no tin nos grandinan na pecho appeared first on Bon Bini, MasNoticia.

Problema entre dos colega na trabou a caba na sacamento di machete

masnoticia — Thu, 23 May 2013 14:53:16 +0000

Diaranzon atardi Polis a bay na e warehouse pariba di ex Wanboy na Tanki Leendert unda tin dos homber ta discutiendo y te asta saca machete pa otro. Na yegada di e patruya a papia cu un di e partidonan y a conta cu e tabatin problema cu su colega cu a sali for di man. E doño di trabou a combersa cu Polis y lo bay evalua ken lo keda y ken lo tin cu bay cas.

The post Problema entre dos colega na trabou a caba na sacamento di machete appeared first on Bon Bini, MasNoticia.

Minister Dowers a haci bon di tuma e asistencia tecnico di Hulanda

masnoticia — Thu, 23 May 2013 14:40:48 +0000

Hopi tabata e criticanan ora cu a haya sa cu Aruba a busca ayudo di 11 polis Hulandes pa fortalece nos Cuerpo Policial.. Segun Parlamentario di AVP Clarisca Velasquez, no ta prome biaha cu Aruba ta haya e cooperacion aki. Despues di Status Aparte a haya ayudo na diferente ocacion. Esaki ta importante paso door cu algun di nos polisnan a bai yuda na Corsow y Boneiro, Aruba a haya e ayudo tecnico aki. Segun e Parlamentario, esaki tabata un bon zet di Minister Dowers. Den pasado tabatin problema paso tipo di ayudonan asina a trece discordia riba e topico di rango pero esaki e biaha aki lo no ta e caso. Semper a existi cooperacion entre e islanan den Reino. E asistencia cu e polisnan aki a bin duna ta den straatdienst. E polisnan cu a bai Corsow a bai pa duna asistencia den e investigacion di e asesinato di Helmin Wiels. Segun Clarisca Velasquez, MEP mester ta cauteloso na ora di ciritca situacionnan manera esun actual. Semper Aruba a traha den lasonan estrecho cu e otro islanan y Hulanda.

Criticanan no ta na nan lugar y mester ta cauteloso. Loke si Clarisca Velasquez por sigura ta cu e cooperacion aki lo no tin influencia riba e rangonan policial ni e posicionnan huridico.

The post Minister Dowers a haci bon di tuma e asistencia tecnico di Hulanda appeared first on Bon Bini, MasNoticia.

Kerekentenchi den movecion ta presenta diabierna 24 Mei movie night den bario di Dakota

masnoticia — Thu, 23 May 2013 14:39:25 +0000

Kerekentenchi ultimamente ta bishitando diferente bario y presenta peliculanan den aire liber e biaha aki ta toka turno na e dushi bario di Dakota, e pelicula escohi ta jama Gnomeo & Juliet cu ta un pelicula cartoons hopi aventuroso y atractivo pa mucha. E movie night ta tuma lugar den e gancha di basketball na Dakota. Pelicula ta cuminsa 7.30pm, tur mucha famia ta keda invita pa bin goza momento agradabel hunto, Kids 2 kids cu ta un grupo di baile cu a sali di Dakota lo presenta 2 show di baile, lo tin premio pa regala na e muchanan cu ta bin gosa di e movie night, etrada ta completamente gratis, lo tin un snack y refreshments center cu popcorn, hotdog na benta pa genera fondo pa continua cu diferente projectonan social den diferente barionan na Aruba.

The post Kerekentenchi den movecion ta presenta diabierna 24 Mei movie night den bario di Dakota appeared first on Bon Bini, MasNoticia.

Benny Nisbet PPA: Guyana mester muda su capital Georgetown mas halto of inverti den su infrastructura segun rapport cu a sali recien

masnoticia — Thu, 23 May 2013 14:35:34 +0000

Mientras cu aki na Aruba cierto medio di comunicacion cu ta protehando interes di Gabinete Mike Eman (AVP) y ta prefera di purba rediculisa intentonan di PPA pa conscientisa nos sociedad pa e posibel consecuencinan di un aumento di nivel di lama den futuro (rising sea levels)… gobernacion y parlamento di otro isla y pais den Caribe ta dedicando atencion serio na e problematica aki y su consecuencianan.Dia 17 di mei 2013 un publicacion na GUYANA a referi na un estudio cu a kaba di keda cla cual estudio ta bisa y PPA ta cita:
“ Guyana must either move it’s capital Georgetown inland to higher ground or invest more heavily in coastel infra structure to withstand future sea level rises, a health and engineering expert says”
Si nos analisa e frase aki bon…. un estudio enorme a worde hasi na GUYANA… pa nan por a jega na e conclusion menciona…y cu aki ta trata inversionan enorme…..sea un decision pa muda henter e capital di GUYANA na un nivel mucho mas halto …..of inversionan enorme …… den su infrastructura.
Aki na Aruba Gabinete Mike Eman, parlamento den su constelacion actual ta sigui drumi….Aruba apararentemente NO ta forma parti di e Caribe ..unda Guyana ta forma parti di djele y majoria di e Islanan Ingles cu ya a hasi estudio …ya a logra capital y ya ta invertiendo pa hiza cierto parti di nan infrastructura mas halto etc. Aruba NO ta corre ningun peliger….. si analisa actitud di nos flamante gobierno di AVP.
PPA por menciona tambe cu expertonan hulandes tabata envolvi den e estudio hasi pa e pais y pueblo di Guyana…!!
Sigiendo cu nos citacion for di e articulo…..’Sea levels are predicted to rise between three and seven feet (1.0 & 2.1 meters) in the next 100 years’
For di un otro articulo riba Internet PPA a cita lo sigiente:
‘Caribbean scientist warns of climate change disaster’…..The Caribbean does not have the luxutery of time for decisive action on climate change and global warming ……..Infact, it is on the brink of Calamity, according to a prominent scientist. Inter Pres. 20 mei …….’
Aki na Aruba nos gobernantenan tin asina hopi miedo pa confronta esaki den estudio serio ejecuta p.e. pa Hulanda. Pasobra na momento cu e cifranan aki ta conoci y Aruba lo mester reserve anualmente un suma di placa substancial, pueblo di Aruba lo Nota ainda mas con grandi e DEFICIT di Aruba realmente ta.Reservando un suma annual di p.e. un 35 million florin minimal lo aumenta e Deficiti arubano cu e cifra aki.
Mientras tanto desde ana 2000 ja kaba 13 ana ta pasando y pais Aruba No a larga hasi ningun estudio serio ta leeuw cu nos sa…..y no ta hasi ningun peticion den cuadra di e areglo di cooperacion den Reino pa junto cu Hulanda larga hasi un estudio serio riba e problematica aki.
PPA lo keda informa nos pueblo riba e materia …cu kizas ta leeuw den tempo pero lo ta dramatico pa e generacionan cu lo sigui nos. No lubida cu e problematica cu lo pone nos unico pilar economico turismo den problema hopi serio y hasta kizas destrui esaki.
PPA ta spera cu gobierno, parlamento y pueblo cominsa tuma bon nota di esaki.

The post Benny Nisbet PPA: Guyana mester muda su capital Georgetown mas halto of inverti den su infrastructura segun rapport cu a sali recien appeared first on Bon Bini, MasNoticia.

Arubus a ta tuma chauffeurnan bek den servicio

masnoticia — Thu, 23 May 2013 14:27:48 +0000

Depues di a evalua e resultado di tur dos caso di e chauffeurnan di Arubus, caminda den e ultimo caso den e vonnis huez a tuma e decision cu Arubus mester tuma e 4 chauffeurnan aki bek na trabou, Arubus lo cumpli cu esaki tambe. Den e cuadro di e decision aki y conhuntamente cu Hunta di Comisario a dicidi di permiti e otro 15 chauffeurnan regresa na trabou, decision cu e Minister di Transporte y alavez di Labor ta sostene.
E decision aki a wordo tuma teniendo na cuenta e situacion financiero di Arubus N.V. Incialmente a pensa riba e posibilidad di bay den un bodem procedure, pero esaki lo a encera cu e 15 chauffeurnn aki lo mester a keda cas durante un periodo di 6 pa 9 luna cu ta e tempo cu por tuma pa e bodem procedure bin dilanti. Esaki ta encera entre 400 mil pa 600 mil Florin na salario cu na e momentonan aki Arubus N.V. no ta den posicion di carga, adicional na e salario di e trahadornan riba contract cu a wordo tuma.
Tanto Gerencia como Hunta di Comisario a considera cu sigui cu un bodem procedure na e momentonan aki no lo tabata algo responsable.
Asina, e decision di tuma e chauffeurnan aki bek na trabou a wordo tuma, cu e deseo cu lo por cuminsa un relacion laboral di nobo cu e chauffeurnan en cuestion, teniendo na cuenta e bienestar di empresa.

The post Arubus a ta tuma chauffeurnan bek den servicio appeared first on Bon Bini, MasNoticia.

Armando Boekhoudt hopi contento cu porfin tin iluminacion den su bario di Papaya

masnoticia — Thu, 23 May 2013 14:24:10 +0000

Diaranson mainta para dilanti di e palo di luz net pariba di entrada di su cas, niun hende por a faya e alegria di Armando Boekhoudt. Un habitante di Papaya cu pa hopi decada a purba haya atencion di politico, gobernante y tur sorto di instancianan concerni pa e situacion di scuridad den su bario.
“En todo caso, sinceramente bisa, basta aña nos ta sperando aki nan. Di tempo mi tata tabata na bida,” Sr. Boekhoudt ta recorda, cu tin 21 aña morto, tabata bisa, “mi yiu mi ta bay, pero ainda mi no ta bay mira ni luz aki bandanan, ni asfalt. “
Pero mirando tur e movecionnan dilanti Papaya 18, cas di famia Boekhoudt, e ta enfatisa, “den menos di 4 aña, sinceramente nos ta mira cu tin trabou ta cuminsa y e no a caba ainda. Nos ta weita claridad di dia, nos ta hayando luz y cu tur speransa cu nos ta bay haya asfalt tambe aki bandanan.”
Accion di Bario
For di tempo cu Gabinete Mike Eman a tuma rienda di gobernacion di Aruba, a dicidi cu ta bay consulta cu barionan cua nan necesidadnan ta. Mas di 3 aña pasa, Prome Minister a cuminsa bishita barionan rond di Aruba semanalmente pa tende for di e bisiñanan mes cua ta nan necesidadnan. Segun Prome Minister Eman, “locual ta conta pa un bario no necesariamente ta valido pa e otro. Cada bario tin su peculiaridadnan.” E ta splica cu un di e preocupacionnan di mas grandi pa habitantenan di Papaya tabata e iluminacion. Anochinan ta hopi scur na Papaya, consecuentemente esaki ta forma un problema pa siguridad di cada cas di famia. Durante di un accion di bario, Armando Boekhoudt ta conta esnan presente dilanti di su cas, con e la comunica Prome Minister algun aña atras e deseo di su bario.
Riba e pregunta di algun miembro di prensa si den pasado e lo a purba haya atencion di e gobierno anterior, Sr. Boekhoudt a contesta mustrando e frustracion di e tempo aya, “e gobierno anterior, nos a lembenan, no papia cu nan, lembenan, pero ni pasa, corda yega pa pone un luz. Si nan a pone un foks mes, nos lo a keda contento, pero ni un foks!”
E trabounan ta sigui den e dianan aki te ora cu henter Papaya haya iluminacion apropia. Segun Prome Minister ta trahando duro tambe pa Papaya haya camindanan apropia, pasobra e camindanan di santo, manera tin na Papaya, no ta adecua pa ningun bario di Aruba. Pero e la splica tambe cu tin hopi bario rond di Aruba cu ta sufri bou di e necesidadnan ey. E proceso di instala luznan LED den barionan rond di Aruba ta pleno ehecucion, pero ainda falta hopi. Mescos e ta pa asfalt, e necesidad ta hopi grandi debi na e negligencia structural y demasiado largo pa pone atencion na e problema aki. Awe, di otro banda, ta traha structuralmente y cu hopi perseverancia riba mehoracion di Aruba henter.

The post Armando Boekhoudt hopi contento cu porfin tin iluminacion den su bario di Papaya appeared first on Bon Bini, MasNoticia.

Acuerdo di cooperacion entre Arubus y WEB ta un ‘win-win-win situation’

masnoticia — Thu, 23 May 2013 14:20:30 +0000

Minister Otmar Oduber tin como un di su obhetivonan, mehora e servicio, eficiencia y efectividad di Arubus, obhetivo cu ta den proceso di wordo cumpli. Den cuadro di esaki tin diferente opcionnan cu a bin dilanti y a wordo papia riba nan conhuntamente cu Gerencia y Hunta di Comisario di e compania di transporte publico, un di nan ta wak e posibilidadnan di bin busnan electrico. Asina a cuminsa mira e diferente opcionnan y companianan cu tin cu ta ofrece e busnan aki y hasta den luna di maart durante un biahe pa Hulanda a haya presentacion y demostracion di e busnan aki. E presentacion a wordo duna na Minister Oduber, representantenan di Arubus y tambe di WEB.
Siguiendo cu e proceso, dos siman pasa, durante e conferencia di Europe Meets the Americas cu a tuma lugar na nos isla, Arubus a firma un Letter of Intent (LOI) cu WEB pa cuminsa cana e caminda pa un cooperacion mas estrecho entre e dos companianan aki, caminda cu WEB den su facilidadnan lo provee coriente na e busnan electrico cu Arubus lo busca dentro di corto tempo.
Den un entrevista cu Oslin Boekhoudt, Director di WEB y Francis Ras, encarga cu e proyecto aki, nan a comenta riba e ventahanan, beneficionan y otro aspectonan di relevancia relaciona cu e busnan electrico.
Francis Ras a duna di conoce cu WEB a bin ta inverti pa añanan caba den upgrading di tecnologia pa produci awa y coriente, pa cual a logra un eficiencia substancial. Awor a yega momento pa sigui drecha eficiencia y e parti di charge busnan electrico ta forma un parti importante di mehora e eficiencia. Esaki lo sosode den oranan di anochi caminda lo yena e produccion cu falta pa por logra un mayor eficiencia.
Sr. Ras ta splica cu anochi WEB mester baha su motornan dor cu e demanda na Aruba ta baha, pesey a bin cu diferente opcionnan con por yena e bashi ey den oranan di anochi y un di e opcionnan ta e busnan electrico. Dor cu anochi (marduga) no tin transporte publico, e busnan por charge durante 6 ora, manteniendo e machinnan di WEB ariba y logrando asina un produccion stabiel cu ta wordo refleha den un mayor eficiencia.
Na momento cu yega na un acuerdo oficial cu Arubus, WEB despues di haya aprobacion pa e presupuesto di e proyecto piloto aki, den un periodo di tres luna lo por tin henter e instalacion cla pa charge e busnan.
Importante di henter e proceso aki ta cu ta trata di un acuerdo cu ta un win-win-win situation. Francis Ras ta indica cu durante e proceso di mehora eficiencia ta wak beneficionan, pesey ta bin cu e proyecto piloto aki caminda ta wak cuanto e ganashi lo ta. “E parti di win-win-win como WEB bo ta baha gastonan di operacion y mantenimiento, pa Arubus nos a proyecta un 30% cu nan tambe por spaar den nan gasto di operacion y si nos logra tur e mehoracionnan den eficiencia y baha gasto di operacion, naturalmente e consumidornan di WEB y esnan cu ta usa transporte publico tambe por ripara un stabilizacion di prijs of un mehoracion di prijs”.

The post Acuerdo di cooperacion entre Arubus y WEB ta un ‘win-win-win situation’ appeared first on Bon Bini, MasNoticia.

Minister Arthur Dowers: E forma di comunica den Brandweer ta haci daño na e credibilidad di e institucion

masnoticia — Thu, 23 May 2013 14:18:48 +0000

Asuntonan cu ta netamente interno mester wordo trata di e forma aki tambe y hibando esaki den publicidad no ta e forma corectro pa trata e discusionnan interno, esaki ta di lamenta y ta crea incertidumbre den nos comunidad, segun Minister di Husticia Arthur Dowers. E mandatario ta referi na e situacion cu a surgi siman pasa den Cuerpo di Bombero, unda cu e sindicato SINBA y/of su abogado ta haciendo declaracionnan publico tocante asuntonan cu mester wordo trata internamente.
Minister Arthur Dowers ta lamenta cu e situacionnan aki ta tumando luga y a reuni caba siman pasa cu e sindicato y tin un reunion planea pa e siman aki cu nan tambe.
E minister a bisa cu e lo hiba un combersacion fuerte di su banda tambe cu e maneho di Brandweer pa garantisa cu den futuro ta preveni excesonan manera ta tumando luga y cual ta causa incertidumbre den comunidad. Minister Dowers a expresa cu por a nota cu e comunicacion y interaccion di hende pa hende den Cuerpo di Bombero ta bayendo atras y e no ta culpando ningun hende pa esaki y tin mas partido ta hunga un rol. “Tur partido mester compronde cu tur hende ta trahando pa e mesun meta, cual ta pa garantisa siguridad den nos comunidad,” Minister Dowers a bisa enfaticamente.
E titular di husticia a subraya cu hopi desaroyo positivo a tuma luga den brandweer den un periodo di apenas tres aña bao di Gabinete Mike Eman y tin hopi cos positivo mas pa tuma luga. E situacion di Brandweer cu e gobierno nobo a haya tabata uno devastador y a traha hopi duro pa logra tur loke a logra caba. Por ehempel Brandweer a ricibi 3 truck nobo den apenas tres aña pa porfin reemplasa e trucknan cu tabata casi 20 aña bieu.
E forma di comunica aki ta haci daño na e credibilidad di e institucion, cual ta algo cu Minister Arthur Dowers ta lamenta. Minister Dowers a comenta cu lo bin un intervencion den top di Brandweer di su banda. E procesonan ta andando, pero mester warda pa e presupuesto di 2013 pasa den Parlamento y si e miembronan di Cuerpo di Bombero no por tene un poco pasenshi “nos tin un problema serio”, Minister Dowers a splica.

The post Minister Arthur Dowers: E forma di comunica den Brandweer ta haci daño na e credibilidad di e institucion appeared first on Bon Bini, MasNoticia.