Diadomingo 6 di November, Aruba Triathlon Association lo tene nan Off Road Triathlon esaki 7or di mainta na Arashi Beach. E OFF Road Triatlon Nacional lo bira e ultimo actividad di triathlon pa e aña aki. Por competi den e categorianan di mucha, junior y adulto mientras por a bay den ekipo di relevo. Lo bay tin dos distancia un “Full distance” cual lo ta landa 700 meter, bicicleta 14 km y core na pia 4.4 km, e asina yama “Half distance” lo ta landa 350 meter, bicicleta 7 km y core na pia 2.2 km.
Pa practica tres disciplina di deporte na e mesun momento no ta facil, e landamento riba cierto distancia den awa ya caba ta uno pisa, e recorido riba bicicleta cu ta sigui despues semper ta esun di mas largo y por ultimo coremento na pia riba un distancia di algun kilometer ta esun di mas pisa sigur despues cu bo a caba di eherce e dos nan prome. Den e ultimo añanan, Aruba Triathlon Association a encurasha varios atleta pa practica e deporte aki. Algun dia pasa pa e Challenge Aruba tabata tin un interes grandi di participante local.
Un danki sigur na Lotto, e Loteria di Aruba cu pa medio di Comision di Subsidio a subsidia e competencia di Off Road Triathlon.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.