E sistema di ranking ta uno hopi importante pa e federacion di tennis di mesa, esta Aruba Table Tennis Association unda hungadonan tin cu lucha cada torneo pa keda halto den puntuacion y posicion pa asina e representacion den exterior por ta mas cu bisto na fabor di lesnan cu ta sobresali. Den e ultimo añanan por a ripara cu esaki a yuda masha hopi unda e atletanan ta haci nan maximo esfuerso pa mantene of mehora nan nivel pa asina duna un miho bataya na nan contrincantenan mas cercano pa a lo largo bira e number uno den nan categoria. E competencia aki sin duda ta uno sano y e mayoria ta haya e oportunidad pa midi nan nivel den exterior esaki den torneonan renombra den region y continente. Aruba Table Tennis Association lo sigui haci nan maximo esfuerso pa cumpli cu nan atletanan organisando torneonan individual y team.
E torneo di ranking ta cana segun schedule unda nos a haya den e categoria u18 un prome luga ta wordo ocupa pa Jeandry Mathilda, e di dos luga pa Chingho Chung y e di tres luga pa Donald Yarzagaray. Den e categoria Open unda a laga dos hungado di nivel halto di Venezuela participa y aki e prome y di dos luga a bay pa e hungadonan Venezolano cu ta Franklin Rodriguez y Manuel Marimon, e hungado local Mario Lobo a keda na di tres luga mientras Jeandry Mathilda a keda na di 4 luga. Mester bisa cu nos hobennan tambe a hunga e torneo di ranking. Na IBISA San Nicolas tambe nos a haya e weganan di ranking den e categoria U13 cu varios participante. Aki e prome luga a bay pa Joseliene Boekhoudt, na di dos luga a keda Dylan de Leca y na di tres luga a keda Renuar Rojas. Na Club Estrella a hunga e weganan den e categoria U11 y aki Shawn Kock a conkista e prome luga, na di dos luga a keda Dylan De Leca y na di tres luga Dixon Ho.
Pa loke ta e standing final di e ranking nos tin den A klas na di 1 luga Mario Lobo cu 5 gana 0 perdi, na di 2 luga Andy Gomes cu 4 gana 1 perdi, na di 3 luga Chingho Chung cu 3 gana 2 perdi, na di 4 luga nos ta haya Jeandry Mathilda cu 3 gana 3 perdi, na di 5 luga nos tin Franklin Lopes cu 1 gana 4 perdi, na di 6 luga nos tin Donald Yarzagaray 5 perdi 0 gana. Pa loke ta e categoria di B klas na di 1 luga nos ta haya Alfred Leong, na di 2 luga nos tin Jean Claude Hoek, na di 3 luga nos ta haya James Letren y na di 4 luga nos tin Bob Chung.
Stichting Sportsubsidie Aruba tambe a yuda subsidia e torneo di ranking den e deporte di tennis di mesa organisa pa Aruba Table Tennis Association
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.