Den fin di siman cu a caba di pasa, Federacion di Ahedres Aruba (FAA) a organisa su tradicional Copa Himno y Bandera riba dianan 17, 18 y 19 di Maart. Riba e fechanan aki a hunga e categorianan U-18 y Abierto. E categoria di U-12 a ser hunga riba un solo dia, esta 18 di Maart.
Den U-18 un total di 12 hungador a participa, cualnan a hunga 5 buelta en total. E di tres luga a bay pa e hungador Matthew Martinez cu a termina cu 3,5 punto di 5 wega. Ethan Croeze, cu tambe tabatin 3,5 punto, despues di regla di desempate a termina na di dos luga. Na di prome lugar a termina Eldrick Donata, cu a keda invicto durante e torneo y logra di gana tur su 5 weganan, terminando cu 5 punto di 5 wega.
Tabatin premio special (medaya) pa e mihor hungado di U-16 cu a ser gana pa Thamara Sagastegui cu 3 punto di 5 wega, mientras cu Ayden Dirks a sali e mihor hungador di U-14 y a score 2,5 punto di 5 wega.
Den e categoria Abierto un total di 17 hungado a participa, cualnan tambe a hunga 5 buelta. E di tres luga a bay pa Woman FIDE Master Maria Diaz cu a termina cu 3,5 punto di 5 wega. Na di dos luga a termina Angel Centeno cu tambe tabatin 3,5 punto, pero despues di reglanan di desempate a termina como sub-campeon. Na prome luga, invicto y cu 4 punto, a termina e hoben prospecto Maestro Candidato Jomar Benschop.
Federacion di Ahedres Aruba ta mira bek riba un exitoso torneo unda atrobe un cantidad grandi di hoben a participa. FAA kier a gradici Comision di Subsidio pa su aporte financiero, yudando di e forma aki pa ahedres sigui engrandece su mes na Aruba, muy en especial bou di hubentud.
.