For di aña pasa, vooral durante campaña por a mira cu tabata tin cierto consensus, ariba e legalisacion di cannabis. Sr. Anco Ringeling, director di AZV ta splica.
Te ainda, cientificamente, e uzo di cannabis no ta suficientemente studia, segun Sr. Ringeling. Pa un remedi drenta mercado, nan ta pone hopi exigencia pa cu esey. Pa esey e farmaceuticonan, nan ta asina caro. Mester haci hopi research y esey no a wordo haci ainda pa cannabis. Esey no ta kita cu tin diferente testimonionan, cu pa cierto malesa e cannabis tin e efecto desea. Mas y mas paisnan ta permiti esey, e uzo medicinal di cannabis.
Aruba ta un pais relativamente chikito, pa loke ta nos poblacion, nos recursonan. Dentro di Reino, Hulanda ta acepta e uzo di cannabis medicinal. Eynan e ta hopi bon controla. Ta cuminsa for di unda e ta wordo cultiva, bou di circumstancianan controla. Despues cu e ta cla pa wordo duna na e boticarionan, un biaha mas e ta wordo controla, e diferente substancianan cu tin den e cannabis. Mester tin laboratorionan specialisa pa haci tur e cosnan ey.
Si Hulanda tin e proceso ey caba, pakico Aruba mester haci aki? En todo caso, pa cuminsa cun’e, mester wak si Aruba por importa for di Hulanda, y asina ta sigur cu e calidad ta ok. Na Hulanda, e ta cannabis medicinal. No ta hay’ e ariba caya. Esun cu ta dun’e, pa cuminsa, e e mester wordo prescribi pa un dokter. Esun cu ta bay dun’e, of bend’e, ta un botica, un boticario.
Na Aruba, dokternan di cas, no ta mucho avanza den e materia y e ora ta puntra con nan ta bay prescribi algo cu nan mes no ta kere den dje. Sr. Ringleing a splica cu dokternan di cas mester keda upgrade nan mes. Na Hulanda, dokternan di cas tin un sorto di protocol, pa ki tipo di indicacion ta prescribi e remedi y pa con largo. Si p.e. E dokernan di cas na Aruba, siguie protocol aki, nan tin un base y no mester trah’e di nobo na Aruba.