Pa algun siman caba den algun medio di prensa local y entre mayornan, tin un droga nobo cu yama Strawberry Quick riba mercado. Juendel Sprock, director di Fundacion Anti Droga Aruba, a comenta cu no tin nada oficial riba dje.
A tuma nota berdad via Facebook y Whatsapp Chat cu tin un mensahe ta circulando cu tin un droga cu yama Strawberry Quick. A tuma contacto cu polis y informacion ta bisa cu ainda ningun melding oficial a drenta. Tambe a tuma contacto cu coleganan na Merca, pasobra hopi biaha e droganan aki ta mas popular na Merca. Na Merca tambe, National Drug Institute a bisa cu Sprock cu esey tabata algo cu a pasa eynan na 2008 bin ariba, pero tambe tabata algo cu no tabata sigur. Nunca a drenta un melding cu ta bisa cu si e droga aki tey presente, cu nan a hay’e y por a test’e. Locual si tin ta e parti caminda cu ta wak e droga cu nan ta dun’e den un forma mas atractivo. E droga ta haya un color roos y tambe tin biaha nan ta dun’e un forma of tin biaha tin biaha ta dun’e un smaak. Oficialmente ainda no tin ningun melding a drenta di informacionnan cu ta haya di cuerpo policial cu ta mustra cu e droga a yega riba mercado local.
Conoce otro tipo di droga cu parce mangel. Segun Sprock, door cu Strawberry ta algo cu mucha gusta. E tin un holor dushi y door cu e yama Strawberry Quick, ta e puiro cu ta un marca cu ta traha Strawberry shake cun’e. E tin un holor dushi y un sabor dushi. Esey ta loke nan ta categorisa Strawberry Quick cun’e. E droga cu e tin aden ta MDMA, cu ta traha extasy of molly cune. Cu tin algo oficialmente, no, segun Sprock. A tuma contacto cu diferente scol, cu a confirma cu nan no a tuma nota di ningun droga roos cu hoben y muchanan ta papiando di dje. Si inoficialmente a haya informacion di un miembro di prensa cu si tin algo asina cu nan a tende di dje cu tin color roos y tin un smaak y aroma di strawberry.
Pa FADA ta bon pa ta alerta asina mes riba kico e yiu ta tuma di hende pasobra den pasado ya nos a conoce caso di lolipop como droga segun Juendel Sprock.
Pesey mes a tuma e oportunidad aki tambe pa trece e mensahe dilanti cu mayornan, educadornan, tur hende cu ta traha cu mucha di cerca, pa semper educa, informa e muchanan cu ora cu haya un mangel, of loke sea for di un hende cu bo no conoce, por fabor, no tuma esaki y tambe bisa e mucha trec’e pabo como esun cu ta eduk’e, como e mayor, pa asina eynan por check’e, wak si esaki no tin ningun substancia den dje.
Tambe no mester lubida cu nos ta den temporada di Sinterklaas. Tin hopi mangel ta circula y e ta bon pa mayornan pa educadornan informa y educa e muchanan cu ora cu haya un saco di mangel, preferibel ta tum’e, pasobra nan ta tira e mangelnan, muchanan ta piki e mangelnan, hib’e na e mayor y laga e mayornan controla esaki pa despues e mucha por come su mangel trankil asina, segun Sprock.