Segun analistanan, e caida den masa di usuarionan por ta relaciona cu e hecho cu e Reglamento di Proteccion di Datonan di Union Europeo a drenta na vigor.
Analistanan di e sector tecnologico ta predici cu Facebook lo sufri un perdida of un paralisacion den e cantidad di usuario Europeo, segun The Telegraph.
E fundado di Facebook, Mark Zuckerberg, diahuebs lo presenta e resultadonan oficial di e balans trimestral y e datonan di estadistica di e red social. Expertonan ta predeci cu nan lo por constata un caida den e segmento Europeo di usuarionan activo mensual.
Segun analistanan, e disminucion di e masa di usuario por ta relaciona cu e entrada na vigor di e Reglamento General di Proteccion di Datonan di UE (GDPR pa su abrevacion na ingles) dia 25 di mei ultimo. GDPR ta demanda cu e usuarionan acepta of no e uzo di su informacion personal, incluso e uzo di reconocimento facial, pa asina e red por personalisa su anuncionan.
Na februari ultimo, Facebook a registra pa prome biaha un caida den e cantidad di personanan cu ta subi Facebook ariba un base diario na Norteamerica y tambe e tempo cu e usuarionan ta pasa ariba e red social, segun datonan di e dos ultimo trimesternan di aña pasa.