CANNES, Francia – E paseo maritimo di Cannes ya caba tabata hopi bunita prome cu e autoridadnan a instala un fila di potchi mata gigante. Pero e matanan no ta eynan pa haci e luga bunita, pero ta un medida di siguridad pa evita atakenan terorista durante e festival cinematografico.
E festival di Cannes, cual lo inicia diaranson, lo ta e prome desde e atake na e ciudad bisiña Niza na Juli di aña pasa, ora cu un homber di origen Tunecino a mata 80 persona, na momento cu esaki a ataca e personana aki cu su truck di 19 ton. E publico tabata celebrando Dia di Bastilla riba e paseo maritimo aki.
E potchi matanan aki, mes halto cu e ta cubri un persona su schouder ora e ta para, a wordo poni a lo largo di Cannes Croisette, pa actua como un barera discreto di concret cu lo mester stop un atake similar sea cu truck of auto.
Polis a inverti tambe 160 m di cadenanna di punta cu lo por stop un truck, a desplega forsnan di siguridad adicional y a convoca un batayon di boluntario civil pa informa di cualkier actividad sospechoso.
Polis Frances no tin informacion di un menasa specifico, pero masha poco evento tin un perfil mas halto cu e festival aki. E aña aki, Will Smith y Nicole Kidman lo ta e streanan di Hollywood cu lo ta asistiendo. E festival aki lo wordo celebra entre 17 y 28 di Mei proximo.
Francia ta riba alerta desde November 2015, na momento cu atakenan coordina a laga 130 persona morto y 168 persona herida na Paris.
Fuente: www.reuters.com