Exprodesk ta presenta su ultimo tayernan pa 2017 riba dialuna y diamars awor na nos oficina na Sun Plaza Mall. Exprodesk ta sigui informa y conscientisa miembronan di nos Industria Creativo mirando e potencial grandi cu e industria aki tin economicamente. P’esey nos kier a invita un y tur cu ta parti di e Industria Creativo pa registra y participa na nos proximo tayernan.
Dialuna awor dia 23 di october nos ta enfocando ariba e tema di Propiedad Intelectual caminda cu Departamento Bureau Intellectuele Eigendom (BIE) conhuntamente cu Asociacion di Musico y Artistanan Arubano(AMAA) lo ta compartiendo riba temanan manera; – E motibo pa proteha bo obra, – Con pa proteha bo obranan, – Kico ta e costo pa proteccion y na unda registra nan. Esaki ta algun di e topiconan cu nan lo trata riba dialuna awor.
Diamars dia 24 di october nos ta sigui cu e tayer ariba e tereno di belasting. Pricewaterhousecoopers (PWC), a pone su mes disponibel pa contribui na informa y asisti e Industria Creativo completamente gratis riba e dia’ki. Belasting ta un tema cu hopi biaha no ta ricibi e atencion debido. Sinembargo, e ta sumamente importante si abo como empresario kier crece y exporta bo producto of servicio. PWC, su expertonan lo ta compartiendo nan conocemento y duna tur esunnan presente diamars awor, conseho y informacion gratuitamente.
Nos di Exprodesk un biaha mas ta invita bo pa registra y participa na e tayernan aki. Nan ta completamente gratis! Tanto riba dia 23 y 24 awor nos ta cuminsa pa 9’or di mainta y ta termina pa 12’or di merdia. Yama nos na 582-1181 of e-mail nos na [email protected]