exploluna
Bo ta imagina un explosion nuclear riba luna? Merca tabatin un plan asina mas di mei siglo pasa y CNN ta relata cu nan tin documentonan pa proba esaki. E proyecto aki tabata yama A119 pero nunca el a wordo ehecuta. Lider di e proyecto aki tabata e cientifico Leonard Reiffel y el a splica cu meta di e plan tabata pa evalua e efecto di un explosion nuclear chikito riba luna. E cientifico cu awo tin 85 ana a bisa cu e proyecto aki tabata planea pa den 1958, net na momento cu e guera frieuw tabata tumando luga entre Merca y Rusia. Rusia ya a haci diferente experimento  y apone e prome satelite artificial na mundo den orbita y mErca no kier a keda atras.
E scientifico a sigui bisa cu e proyecto tabata proyecta pa demostra e otro paisnan cu Merca tambe por y no ta debil. Na mes momento e lo a fungi como un test tambe pa si un dia lo tin un guera espacial. E plan tabata pa lansa e misil desde di un luga secreto pa luna. Tambe a wordo bisa cu e gobierno di e tempo ey lo tabata kier a manda un misil cu mesun forza cu esun di Hiroshima, pero e scientifico a bisa cu e si no a forma parti di esey. Si proyecto lo a laga un krater chikito so riba e luna y nan tabata wak si por evita cu e gasnan toxico lo a jega tera. Pero pa 1959 a stop tur e plannan aki ya cu tabata teme pa e seguridad di mundo y e opinion publico. CNN a purba haya comentario di e Forsa Aereo pero asta despues di mas cu 50 ana nan no ta duna comentario riba e topico aki.