Un ekipo di experto Arubiano di TNO Caribbean a asisti e cooperativa di produccion y exportacion di bacoba mas grandi di Republica Dominicana pa soluciona su problema di energia. Expertonan Arubiano mester percura cu e sistema di coriente ta mas sostenibel y confiabel pa sigura un produccion duradero.
E cooperativa Dominicano a acerca TNO Caribbean cu e pregunta pa conseho riba e desaroyo di un solucion economico pa un sistema mas confiabel y mas sostenibel pa aplica na e plantacionnan di bacoba.
No por conta tur ora riba e suministro di coriente den e areanan rural na Republica Dominicana. Pa e motibo aki, hopi di e plantacionnan ta depende riba generadornan cu ta traha riba diesel pa coriente necesario pa asina pompnan di irigacion por traha. E pompnan di irigacion ta particularmente consumidonan grandi di coriente.
E ekipo di expertonan Arubiano di TNO Caribbean na prome instante a efectua un audicion di e uzo di coriente y tambe a evalua e sistemanan cu ta uza. A base di e analisis cu a sali afo, a bin cu recomendacionnan, unda a propone uzo di pompnan cu ta mucho mas eficiente.
Adicionalmente nan a studia e posibilidad pa combina energia solar pa asina baha e gasto di coriente y sigura un suministro di coriente cu ta mas confiabel. A inclui un produccion di bio-gas pa genera coriente durante oranan di anochi como un opcion. E proposicion di e sistema aki ta resulta na practicamente un suministro di coriente cu practicamente ta independiente na un red.
E diseño di TNO Caribbean na e momentonan aki ta den implementacion na un finca cu ta fungi como demostracion. E perspectiva ta cu por implementa sistemanan similar na otro plantacion y fincanan cu ta parti di e cooperativa aki, unabes cu por prueba cu e sistema aki ta traha bon. E proyecto aki ta promove tanto comercio husto y ta baha e impacto climatologico di e produccion di bacoba.
Motibo cu a bati na porta di TNO Caribbean ta debi na e reputacion di e organisacion cu su base na Aruba, como un entidad independiente di expertonan riba sistemanan di energia duradero den un ambiente special di isla.