Pa di cuater aña consecutivo, Museo Arqueologico Nacional Aruba (MANA), hunto cu Stichting Monumentenfonds, ta ofrece un y tur cu ta interesa den historia di nos antepasadonan, un expedicion arkeologico. E actividad aki ya pa tres aña a demostra di ta uno hopi exitoso y a pidi pa un ripiticion. E aña aki lo organisa e actividad gratis aki riba Diadomingo dia 26 di November entre 10’or di mainta pa 2’or di merdia, cuminsando na e Multifunctionele Accomodatie (MFA) di Paradera, den un ambiente di fin di aña y lo encera un bishita na e dushi actividad di Monumentenfonds di “Fiesta di Cunucu”.
Ya pa tres aña MANA ta cera cabes cu Stichting Monumentenfonds y ta participa den luna di monumento, cual ta September, treciendo e actividad di e expedicion arkeologico pa asina concientisa pueblo di Aruba cu sitionan arkeologico tambe ta monumento y mester di nan preservacion (conservacion, proteccion y maneho). Cada aña a cambia e ruta y a inclui otro sitionan arkeologico como tambe sitionan cu por ehempel di arte contemporaneo inspira pa nos antepasadonan. E formula aki a haci cu e expedicion a keda atractivo pa tanto esnan cu nunca antes a participa, como tambe pa esnan cu ta participa fiel cada aña.
Atrobe a adapta e expedicion y lo inclui 2 sitio cu ta riba tereno priva. Pues e aña aki tin e oportunidad unico pa mira 2 sitio cu normalmente no ta accesibel pa bishitante y alabes e participante por haya un experiencia con nos herencia cultural arkeologico tambe por ser conserva den un ‘setting’ priva. Alabes lo bishita e sitio arkeologico na St. Cruz 35, na unda e team di arkeologo y asistente di arkeologo a haci descubrimentonan unico unda informacion nobo a sali for di nan investigacionnan cu ta ‘rewrite’ un parti di historia di nos isla.
Na cada sitio arkeologico lo tin expertonan den arkeologia presente cu por duna un bista unico na e participantenan di e expedicion arkeologico aki, tocante e sitio specificonan. E recorido lo cuminsa na e MFA Paradera, unda participantenan por haci uso di e parkeo pa pone nan auto y subi den un dje busnan. Pa esnan cu ta prefera di haci e recorido cu propio transporte, por pasa busca un mapa na MANA of sigui un di e busnan.
Museo Arqueologico y Stichting Monumentenfonds ta hopi agradeci na De Palm Tours, cual a pone 3 bus disponibel, pa asina haci e expedicion arkeologico pa e aña aki posibel. Un danki tambe na MFA Paradera pa e colaboracion encuanto e parkeo, na sr. Schoonen y na Stichting Eliezer pa haci e sitionan arkeologico riba nan tereno accesibel pa publico riba e dia special aki y na tur boluntario cu ta yuda MANA pa haci e actividad interesante aki posibel.
Cupo riba e busnan ta limita, pues yama Museo Arqueologico na tel. 582-8979 pa registra bo famia of grupo di amigo pa asina sigura bo(so) lugar riba e bus. Participantenan mester percura pa trece suficiente awa, algo di snack, sunblock, spray contra sangura y bisti un bon sapato pa e sitionan unda cu lo mester cana un pida den mondi. Participantenan mester ta na MFA Paradera pa 9.30 am pa confirma nan presencia.