Exitoso conferencia di Copa Airlines na Aruba

0
RBC Juli 2018
Funmiles-2018

E siman aki, Aruba ta sede di e conferencia di Copa Airlines Vacations di Chile cu un grupo di operadornan exclusivo, como tambe ehecutivonan clave di Copa Airlines.

Durante e apertura oficial, CEO di ATA, Ronella Tjin Asjoe-Croes a yama e participantenan bonbini y a duna presentacion di e resultadonan recien di nos turismo, nos destino y kico ta e plannan riba mesa.
El a laga sa cu Latino America ta wordo considera como un mercado cu un potencial grandi y como parti clave di diversificacion di mercadonan di Aruba.

Copa Airlines ta un di e aerolineanan cu ta domina e mercado di Latino America pa Aruba cu vuelonan diario y cu bon conexion for di e diferente mercadonan.

Vice Presidente de Ventas di Copa Airlines, Christophe Didier a laga sa cu Copa Airlines tin conferencianan anual pa cada un di nan paisnan di Latino America. E mercado di Chile a opta e aña aki pa tene nan conferencia na Aruba, brindando varios di e operadornan clave un “first hand experience” di Aruba.

Chile ta e di cuatro mercado mas importante pa Latino America. E bishitante Chileno ta keda un promedio di 7.8 anochi riba nos isla.

Turismo di Latino America a trece te cu mei 2018, 55.449 bishitante pa nos destinacion, cu ta 12.4% di e total di turismo pa Aruba. Atrabes di encuentronan manera esaki, A.T.A. ta percura pa mantene un relacion estrecho y fructifero cu e socionan di sector turistico na Latino America.

E programa completo di e conferencia, a inclui presentacionnan informativo y tambe sesionnan di training pa cu e destino Aruba y con por mercadea Aruba den e mercado di Chile. Ademas a bishita diferente hotel y cu e cooperacion di varios socio den e sector turistico, e operadornan invita por a experiencia un poco di nos cultura, arte y historia y asina ofrece mas informacion ora di promove nos isla.

E grupo di Copa Vacations a wordo acompaña pa algun periodista di entre otro Revista Caras, Ladevi, Diario La Tercera, Revista Gazeta y Mercurio.

Oficina di Turismo ta gradici Copa Airlines pa scoge Aruba como sede, y tambe ta gradici tur esnan cu a forma parti di e Conferencia di Copa Vacations y ta spera di por sigui traha hunto na bienestar di turismo di nos pais.
-FIN-

Comments

comments

C: Heineken
new india
dvg