Un di e retonan mas grandi pa educadornan, sea na scol regular pero particularmente na Centronan di Cuido di Mucha, ta anda cu muchanan cu ta rekeri atencion special. Autismo of e syndrome di “Autism Spectrum Disorder”, ASD ta un di nan. Centronan di Cuido ta e ambiente ideal pa reconoce e sintomanan y tambe ofrece e prome intervencion cu semper ta yuda. Pa e motibonan aki, Fundacion pa Nos Muchanan conhuntamente cu Fundacion Autismo Aruba a organisa un tayer ‘Compronde Autismo’ pa eleva conocemento riba e tema. Temanan tabata, entre otro, Con pa traha cu mucha cu Autismo den grupo; Compronde Autismo; Con pa traha cu ‘pictogram’; Comunicacion visual; Con pa observa mucha cu tin ASD; Lenguahe y comportacion social. Centronan cu a participa ta, entre otro, Tiponi, Pasa Dushi Pasa Pret, Villa Doortje, Belle Bambino, Pretty Flower, Big Bird, Smart Kidz, De Glimlach, Chikitin Bin Bin, Stichting Magic Kingdom, Stichting Kids Creation y Debby Doo Speelschool. FPNM ta gradici oradornan, Gisele van Grieken Speech and LanguageTherapist & Uleike Tromp Behavior Therapist pa nan tremendo instruccion y ta felicita e lidernan, deseando nan exito den nan trabou cu mucha!