Minister Otmar Oduber encarga cu Cultura ta haya hopi lastima cu e fraccion di MEP ta vota contra di restauracion di monumento na San Nicolas. Esaki a resalta durante reunion cu a tuma luga den Parlamento caminda cu a vota pa bay restaura un edificio cu na e momentonan aki ta Uncle Louis Store na San Nicolas. Un edificio cu ta den curason di e area na Promenade cu aworaki a wordo restaura. Gobierno a haci inversionnan grandi cu e idea di crea un districto di cultura y historia cu ta bira un atraccion turistico y tambe pa nos hendenan local bay.
E edificio aki a wordo bandona den periodo di gobernacion di MEP pasobra el a wordo ‘afgekeurd’. Awe nos ta dreche, e no ta costa gobierno niun cen y ta wordo haci door di e fondo di restauracion di Aruba den e caso aki Monumentenfonds, caminda cu 2.6 miyon florin ta bay wordo hinca den e edificio aki. Gobierno ta bay paga menos huur cu locual ta pagando aworaki pa un edificio cu no ta di gobierno. Aworaki lo bay den un edificio di Gobierno cu ta maneha pa monumentenfonds. Segun Minister Oduber a sigui splica, MEP a keda argumenta cu e ta bay costa 2 miyon mas (over di 25 aña). Na mantencion so bo ta surpasa e suma aki cu hopi y a bisa hopi fuerte den parlamento cu esaki ta cu simplemente nan ta contra San Nicolas.
“Chris Romero, un parlamentario di MEP di San Nicolas, no a ni presentea na e reunion, mi ta convenci cu si e tabata aki e lo no a vota contra di e ley aki. Sr. Glenbert Croes tabata tey y ora cu el a ripara cu ta bay vota contra, a bandona y no kier a vota. Asina 3 miembro so di e fraccion di MEP a vota contra di un ley cu ta duna oportunidad cu un departamento di Gobierno (Departamento di Cultura) ta bay Pariba. Cu esaki ta crea mas movecion y circulacion Pariba, ta restaura un edificio cu a bandona, e no ta costa gobierno niun cen y riba dje ta baha gastonan di huur. Si ta vota contra, e ora simplemente ta bay contra tur locual cu por ta bon pa e comunidad aki y esaki ta loke a motiva MEP. Mi ta contento cu Sr. Bikker (PDR) y cu e fraccion completo di AVP a vota na fabor”, Minister Oduber a conclui.