MADRID, Spaña- E muhenan, hiba pa e pais Europeo bou di engaño, a wordo explota sexualmente pa un red di cinco persona.
Autoridadnan Spaño y Austriaco a desmantela un red di explotacion sexual dirigi pa e Venezolano Mariana Pares, cu tabata Señorita Venezuela Internacional 2016.
Agentenan a detene cinco miembro di e banda criminal aki, dos homber y tres muhe Venezolano, dos di nan tin dobel nacionalidad Spaño. Den e esaki a logra libera 15 hende muhe cu a wordo hiba Vienna (Austria) bou di promesanan falso pa nan wordo explota sexualmente, segun polis Spaño.
E investigacionnan a cuminsa ora un di e victimanan a entrega un denuncia na e Oficina Federal di Investigacion Criminal, na Austria. Según su declaracion, el a wordo recluta na Venezuela cu e promesa falso di un trabao cu bon pago den e capital Austriaco.
E hoben a splica cu e organisacion tabata cumpra e pasashi. Na su yegada el a wordo hiba pa un appartment di cita unda el a wordo cera paden y obliga na prostitui su mes, den condicionnan abusivo. Su documentonan a wordo kita for di dje, cual a pone cu e no por a scapa y semper bou di e mirada vigilante di su secuestradonan.
E muhenan tabata wordo chantahia y menasa tanto psikico como fisicamente pa nan bay di acuerdo pa bay den prostitucion y pa na wordo contacta via un webpage.
Ken ta e hefe?
Na cabes di e red aki di explotacion di persona ta haya e Venezolano di solamente 22 aña, cu a participa den e concurso di beyesa Señorita Venezuela Internacional, na 2016.
Segun e investigacion, Pares tabata obliga e muhenan bou di su manda pa nan practica prostitucion henter dia, 24 ora pa dia. Tur ganashi cu nan haci, mester a wordo entrega na nan captornan, cu tambe tabata cobranan gastonan di hospedahe, cuminda y transporte hopi mas halto di e prijsnan real.
Den un grabacion cu ta circula riba rednan social, un muhe, presuntamente Pares, ta splica e condicionnan fraudulento bou di cual nan tabata gara nan victimanan.
Prome cu na bay biaha, nan tabata bisa e victimanan cu nan lo cubri tur e gastonan, cu nan lo haya e mita di e ganashinan pa traha como escort y cu nan lo mester paga solamente e pasashi ora cu nan yega Vienna. E costo di e pasashi ta di 2500 euro. Finalmente, nan no tabata tin acceso na nada di loke a wordo acorda.
Den e audio, Pares tabata afirma cu niun autoridad lo haci pregunta, cu e “trabao tabata suave” y cu lo haya un ganashi di 100 euro pa hora. E muhe tabata priminti cu den tres luna e participantenan lo yega na 10 mil euro, y cu nan mester ta mucha muhenan hopi bunita”.
Riba rednan social, e Venezolano tabata publica imagennan di su bida miyonario den e pais Europeo.