Shoco Awards a wordo amplia 7 aña pasa y tabata manera e Grammy Awards di Aruba unda cu tabata reconoce tur esunnan cu ta traha den e industria di turismo. Compania y nominadonan tabata hopi entusiasma y e tabata un honor pa e nominado y esunnan cu tabata gana. P’esey ta di lamenta cu esaki a wordo cancela
Shoco awards tabata un incentivo tambe pa tur persona cu ta traha den e industria di turismo na Aruba. Ta lamenta cu despues di tanto aña consecutivo cu a organisa e evento den un forma grandi y televisa, awor a djis dicidi pa cancela esaki. Desapuntando asina tur cu a wordo nomina y cu ainda por a wordo nomina. “Ta spera cu e evento por tuma luga ainda den futuro”, Ex Minister Oduber a expresa.
“Grammy’s di Aruba”
Shoco Awards ta un evento cu den pasado tabata wordo organisa solamente pa e miembronan di AHATA door di AHATA. Desde e prome biaha cu Ex Minister Oduber a experencia esaki, el a haye algo asina ‘great’ y pensa cu esaki no mester wordo organisa pa miembronan di AHATA. Mirando e importancia di turismo y mirando cu e ta algo asina bon, e ta di opinion cu e mester wordo organisa pa tur cu ta traha den e industria. Como tal, a dicidi e ora ey cu e lo bira un premiacion Nacional unda cu tur compania cu ta traha directamente of indirectamente cu turismo por nomina nan empleado pa e evento aki (teniendo cuenta cu algun rekisto).
Consecuentemente e evento a bira posibel door di Ministerio di Turismo conhuntamente AHATA cu ta organisa esaki, den colaboracion cu diferente compania y organisacion. Mester menciona cu esunnan cu for di principio a sostene e proyecto aki den grandi ta ATA y ATA. Algun di e categorianan de Shoco Awards ta: Employee of the year, Supervisor of the year, Manager of the year, Tour Guide of the year, One Happy Island Ambassador, Lifetime Achievement Award cu tabata bay pa personanan cu mas di 25 aña di experiencia den e industria, Simon Oduber Jr. Award of Excellence y diferente otro reconocemento special. E intencion tabata cu lo a sigui mantene esaki unda ta organisa e evento den conhunto pasobra ta mira e importancia di turismo. Tambe ta reconoce con importante e personanan ta cu ta traha tur dia cu turistanan directamente of indirectamente.