Ex- guardia di CEA condena na trabao comunitario

0

Diahuebs Corte den Prome Instancia a trata e caso contra di e ex- guardia di CEA, D., kende ta wordo acusa di a menasa su colega cu’n arma.

Caso
Fiscal a bisa Hues cu e acusacion contra D. ta cu dia 15 November 2014 el a menaza su colega, homber H., cu morto cu un pistol. Hues a remarca cu e caso ta hopi bieu y e puntra D. kico a pasa e dia ey. D. a bisa cu e no a haci nada. Hues a mustra cu e guardia H. a denuncia cu D. a arma un pistol y apunta e arma ariba su persona. Tambe tin declaracion di un otro guardia, R, cu ta bisa cu esey a pasa. Pero D., ta para ariba cu no ta berdad. Hues a mustra cu R. a bisa cu el a mira D. hari y apunta e pistol riba H. Un otro colega K. tambe a bisa di a mira esey. Segun D., K. tabata cu lomba p’e y no a mira nada. Hues a mustra cu segun K., D. a pone arma riba pecho di H. na un forma masha tof mes. Hues a puntra D. si ainda e ta traha cu CEA na KIA. D. a splica Hues cu el a wordo manda pa Guarda Nos Costa y actualmente e ta na disposicion di minister di Husticia. Segun D., e ta yuda pone bandera y ta cana cu e minister unda cu e bay, como bodyguard. Ora cu fiscal a puntra D., si e ta cana arma, ora cu e ta cu e minister el contesta cu no.

Abogado Defensor
Abogado defensor di D., mr. S. Faarup a splica cu D., a yega di sufri un accidente na 2005, caminda e tabata victima di “hit and run” . D., tabata core brommer e tempo ey. E impacto tabata uno asina fuerta cu el a wordo declara morto. Ya caba e tabata den shershi ora cu diripiente el a lanta sinta. E ora nan a hink’e den ambulance, mand’e pa hospital. Aki el a keda 7 luna den coma, coma y dokter a bisa cu e lo keda sin por cana mas mirando tur e fracturanan cu el a sufri. D. a recupera y ta cana bon bon. D. a bisa cu psycologo a bis’e, cu e mester papia esaki pa saca tur loke el a sinti. Segun D., el a haya un di dos chance den bida. Cierto partiann di su curpa a keda afecta, pero esey no ta strob’e di traha.

Fiscal
Fiscal a bisa cu H. a haci denuncia y tin e testigonan: K., R. y d C., cu a mira kico a sosode. Fiscal ta haya cu H. a pasa e susto di su bida. Fiscal a bisa Hues cu teniendo cuenta cu e caso ta bieu y tambe teniendo cuenta cu e condicion di D., el a exigi 120 ora di trabou pa comunidad di cual 60 ora ta condicional.

Pleidooi
Abogado mr. Faarup, a bisa Hues cu for di e declaracion di e testigonan, por considera esaki un joke cual no a cay den bon tera. Ta den un oficina chikito mester a revisa e arma prome cu nan subi warda na KIA. E abogado a bisa Hues cu el a papia cu H. na Corte, kende ta para riba cu a sosode manera el a declara pero e no kier pa castiga D. mas. E abogado a bisa Hues tambe cu D. tabata victima di un hit and run y nunca Polis a haya esun cu a dal’e y core bay. E abogado ta hopi contento con D. a recupera. Abogado di D., mr. Faarup a sigui bisa cu e ta kere cu ta politica a hunga un rol den e asunto aki. Na opinion di e abogado, aparentemente e otro coleganan ta otro color politico. Awor D. ta na disposicion di minister. El a pidi Hues pa tene cuenta cu e caso aki ta hopi bieu y ta laga na decision di Hues pa cu e castigo. Hues a puntra D. kico e ta pensa di e castigo. D. a bisa cu e no ta di acuerdo cu e castigo. El a bisa cu no ta berdad pero e kier sigui bay dilanti. Hues a bisa cu D. lo mester traha 60 ora pa comunidad y D. a bisa cu e por.

Sentencia
Hues a bisa cu a keda legalmente proba cu D. a menaza su colega cu arma. Hues a remarca cu por bien ta cu e tabata un joke, pero esaki ta algo serio. Hues a bay di acuerdo cu e exigencia di Fiscal. Hues a bisa cu door cu e caso ta bieu, e castigo a wordo baha. El a condena D. na 120 ora di trabou pa comunidad di cual 60 ora ta condicional cu un tempo di prueba 2 aña y cu D. ta cay bou supervision di Reclassering. Hues a bisa tambe cu D. lo mester haci e trabounan den un periodo di 1 aña.