Ex empleado di Setar exponi den Panama Papers pa labamento di Placa

0
RBC Juli 2018
Funmiles-2018

For di basta tempo caba tabata tin un rumor cu e fondonan di Setar no tabata riba bon caminda. Segun cu por a compronde un ex empleado di Setar a sa di horta placa tras di lomba di e director, sin cu esaki tabata sa, creando asina un cadena di labamento di placa cu a plama for di Aruba pa e depositonan na Doral na Florida, pa e paraiso di offshore banking di Panama City, di acuerdo cu un demanda presenta den un corte federal di Miami.

E estafa a wordo presuntamente crea pa Egbert Koolman, un ex empleado di Setar. E trabao di Koolman tabata pa cumpra telefon di proveedornan rond mundo pa Setar, pa asina nan por bende bek na consumidornan. Pero e compania a bisa cu Koolman a defrauda e compania “varios miyon” di dollar door di a acepta soborno di proveedornan di telefonia mobil cu sede na Florida cu tabata haya contrato cu prijsnan halto.

Awo Setar ta demandando Koolman, su ex casa y e ex proveedornan di e compania, pa miyones di dollar den daño y perhuicio, manipulacion di licitacion, fraude y extorsion.

Ademas, algun di e telefonnan cumpra pa Kooman tabata defectuoso y a inclui aplicacionnan di pornografia built in, pa berguensa di su doño di trabao, segun e demanda.

Setar a descubri e sospecha di fraude ora cu e nomber di Koolman a aparece den un lista di propietario den exterior, publica online como parti di e exposicion di e Panama Papers, di acuerdo cu e demanda. E leak di 11.5 miyon di documentonan secreto for di e bufete di abogado Mossack Fonseca di Panama cu a pone na descubierto un sistema financiero offshore paralel, accesibel solamente pa esnan rico y bon
conecta – uno cu ta sorprendentemente facil pa defraudadornan na abuso, segun expertonan anticorupcion a bisa.

Corporacionnan offshore tin un solo proposito pa crea anonimato. Documentonan recientemente filtra a revela cu algun di e companianan fantasma aki, manteni den secreto, ta duna cobertura na dictador, politico y evasornan di impuesto.

Y e documentonan inclui den e base di dato – comparti pa e Consorcio Internacional di Periodistanan investigativo cu Miami Herald y su compania madre, McClatchy – ta mustra cu Koolman a set up un compania anonimo na British Virgin Islands y a uze pa habri dos cuenta di banco na Panama. E demanda ta acusa Koolman di encamina e placa horta atrabes di su compania offshore y gast’e riba renobacionnan di su cas
na Aruba, incluyendo drechamento di su pool y panelnan solar. Otro fondonan a wordo uza pa cumpra un pickup pa su yiu homber y paga huur y otro gastonan pa su ex amante, e demanda ta sostene.

Segun e abogado di Setar, sorprendentemente, si no tabata pa e reciente revelacion di e Panama Papers, e conducta ilicito aki por a sigui sin control indefinitivamente.

Setar a kit’e op staande voet Augustus ultimo.

Pero leu di disfruta abiertamente e fruto di su supuesto corupcion,Koolman awo ta biba den un cas modesto na Hialeah. Ningun propiedad na Florida of compania ta registra riba su nomber.

Koolman no a respnde na un mensahe laga diabierna na su cas na Hialeah, cual e ta comparti cu un amiga. Ainda e no ta busca un abogado, segun documentonan hudicial federal ta mustra.

E abogado di Setar ta atribui na Panama Papers cu e salida di e ex gerente di produccion di Setar. “E evidencia fuerte den e caso aki ta indica cu sr. Koolman hunto cu hopi complice, a estafa nos cliente – y realmente e pueblo di Aruba, pa miyones di dollar desde mas cu un decada,” e abogado Benton Curtis a bisa, cu sede na Miami.

E supuesto estafa

Durante e ultimo decada, Koolman ta wordo acusa di a colabora cu su ex casa, un amante y un man yen cumprado pa bende productonan celular pa Setar riba prijsnan 20 porciento mas halto cu e tarifanan di mercado competitivo, di acuerdo cu e demanda cu a wordo presenta e luna aki. Den hopi caso, e telefonnan a wordo reforma – no ta nobo – y infecta cu virus y malware, segun e demanda.

E demanda ta wordo tuma como un acusacion penal, acusando Koolman y otronan pa opera como un “empresa fantasma.” E ta acus’e di sconde e presunto estafa for di su superiornan mediante un plot cu vendornan na Miami pa creacion di “un red secreto di companianan relaciona” bao di e nomber di miembronan di famia di edad avansa y di muchanan pa nan wordo protehi di ehecutivonan di Setar.

Entre 2005 y 2016, “Koolman repeditamente y sistematicamente a abusa su posicion cu Setar door di manipula e proceso di adkisicion pa maneha e negoshinan di su co conspiradornan, “e demanda ta bisa.” E vendornan “lo a recompensa Koolman y otronan cu miyones di dollar na soborno” a cambio di “contratonan di compranan mal haci riba ekiponan di celular.”

No ta cal con hopi Koolman a beneficia di e presunto trama di corupcion, pero e demanda ta bisa cu el a gasta dies di miles di dollar riba su cas na Aruba.

Despues cu e nomber di Koolman a aparece den e documentonan di Panama,
e gerentenan a confronta Koolman, y a conduci na un audit interno, cu a caba na su retiro.

Un di e acusadonan den e caso di Aruba, Chung-Wen “Benny” Wu, a nenga cualkier relacion cu actividad ilegal despues di a wordo haya riba su telefon celular.

“Nos tabata haci negoshi,” Wu a bisa, kende ta maneha Bengo Mobile na Doral y ta un miembro principal di Fellow Trading. “Mi no sa dicon nan ta demandami. Nos tabata djis un vendor pa Setar. Nada di esaki ta berdad. E ta ridiculo.

El a bisa cu mayoria biaha el a papia cu Koolman na telefon, el a topa cun’e algun biaha na trade shows na Las Vegas y nunca el a wordo ofreci dealnan bao di mesa. E compania di Wu ta importa celularnan for di Europa, China y Hong Kong y ta bende nan na proveedornan den Caribe.

Na 2006, Koolman a setup un compania offshore yama 3DK Consultant Corp. den British Virgin Islands. E cadena di isla aki ta conoci pa ta un di e paraisonan fiscal menos transparente di mundo.

Ta imposibel pa sa ken ta doño di un compania na BVI sin tin acceso na documentonan confidencial, interno.

E otro accionistanan di e compania tabata e ex casa di Koolman, Evarina Xiomara Deborah Koolman y nan dos yiunan. Koolman y su casa, kende tabata traha na Centrale Bank di Aruba, a divorcia zomer pasa.

Mientras tanto e ex casa a pidi pa reuni cu Mossack Fonseca pa asina laga nan sa cu e compania 3DK Consultant no ta activo mas. Mientras tanto cu nan a proba di ta otro pasobra varios transaccion a wordo haci na un checking account na e sucursal di Panama di Credicorp Bank cu sede na Lima, emailnan a mustra.

E compania a mantene activo di acuerdo cu e registronan interno di Mossack Fonseca..

Comments

comments

C: Heineken
new india
dvg