PANAMA CITY, Panama – E ex dictador Panameño, Manuel Antonio Noriega, kende tabata interna den un hospital for di Maart despues di a opera di un tumor celebral, a fayece dialuna na edad di 83 aña.
“Señor Noriega a muri awe nochi,” e secretario di Estado di Comunicacio, Manuel Dominguez, a bisa AFP.
“E morto di Manuel Noriega a cera un capitulo di nos historia. Su yiu muhenan y su famia merce un entiero na paz,” e presidente di Panama, Juan Carlos Varela, a comenta poco despues.
Noriega a wordo opera dia 7 di Maart di un tumor benigno den e hospital publico Santo Tomas di e capital Panameño, pero despues di e cirugia tabata tin un derame celebral, cual motibo a wordo interveni.
Tras dos operacion den ocho ora, el a keda den estado critico, di cual ya e no lo a sali.
Noriega a sali temporalmente, dia 28 di Januari for di e prizon El Renacer, na rand di e Canal di Panama, unda cu e ta cumpli condena pa desaparicion y asesinato, pa e opera.
Segun su dokter personal, Eduardo Reyes, na AFP, e tumor “tabata tin un crecimento no spera,” loke a acelera e necesidad di un cirugia pa evita daño na e sistema celebral apesar di e alto riesgo.
Su famianan a solicita den varios ocasion cu a concede e aresto domiciliario definitivo door di a sufri varios derame celebral, complicacionnan pulmonar, cancer di prostaat y depresion, pero tur peticion a wordo rechasa. Deroa tras un cruenta invasion militar Mericano na 1989, Noriega tabata cera for di e tempo ey pa narcotrafico y labamento di placa na Merca y Francia, pais cual a extradit’e na 2011 pa Panama.
Den su pais el a cumpli tres condena pa e desaparicion y asesinato na 1985 di e opositor Hugo Spadafora, di e militar Moises Giroldi, morto despues di a rebela contra dje na 1989 y pa e yamado masacre di Albrook, caminda varios militar a muri, despues di a rebela e ultimo aña.
Tambe e tabata tin otro casonan pendiente pa desaparicionnan tempo cue tabata hefe di e extinto Guardia Nacional y man drechi di e lider nacionalista Omar Torrijos, kende a alcansa poder tras un golpi militar na 1968.
Apesar di a acumula poder y secreto, tanto di copartidario como di opositor, e militar ya no tabata tin influencia politico y nunca a revela e informacion cu el a acumula.
Noriega a pidi “pordon” na 2015 na “tur hende cu a sinti su mes ofendi, afecta, perhudica of humiya pa mi accionnan,” el a manifesta.
Fuente: www.infobae.com