Carnaval ta e fiesta mas grandi di nos pueblo di Aruba, cu e fin di siman aki ta yega na su punto culminante. Pa medio di esaki mi kier desea un y tur un feliz Carnaval. Gosa Carnaval, pero no di mas. Percura pa tur hende celebra y gosa pareu, y e goso por cambia hopi facil den dolor na momento cu tin di mas alcohol y agresion den wega. Evita pa yega asina leu, pa asina abo y nos tur por gosa di e gran fiesta.
Cuida abo y bo sernan keri di e rayonan dañino di solo, cu ta causa primordial di cancer di cuero, un forma di cancer cu na Aruba ta creciendo manera un epidemia.
Cuida bo oido, y specialmente esun di nos muchanan, pasobra zonido demasiado duro den carnaval por causa daño permanente na bo oido. Bo oido ta comunica bo cu resto di mundo, cuid’e pasobra e mester bay cu bo henter bo bida. Feliz Carnaval!