Un punto di discusion fuerte den Parlamento tabata un rapport di PWC cu a costa US$ 250,000. Ta trata di un rapport a base di un mocion di Parlamento na 2015, pa haci un studio na e impacto di all-inclusive na Aruba. Minister Otmar Oduber a basa henter e ley pa regula all-inclusive riba e rapport ey, pero a nenga rotundamente di duna Parlamento e rapport.
Otmar Oduber ta un manipulado y mal gañado. Durante e reunion el a menciona 7 biaha cu e rapport no ta existi. MEP y PDR, hasta presidente di parlamento a pidi pa e rapport, pero el a bisa 7 biaha cu e no ta existi. Un rato despues el a bisa, cu e rapport ta existi, pero cu e no ta oficial. Nos a demanda pa haya e rapport toch, pero el a sigui nenga. Na fin di e reunion, el a admiti cu e rapport ta existi y cu su conclusion ta mescos cu di Banco Central. Pero asina mes e reunion a caba y e rapport no a wordo entrega na Parlamento. Aki presidente di Parlamento a faya, pasobra un documento cu ta e UNICO base pa e ley, no por a keda scondi pa Parlamento. Presidente di Parlamento mester a bisa e minister, pone e rapport riba mesa, sino reunion no ta sigui!
Den e caso aki tin DOS rapport di PWC: un ta un rapport di estudio haci pa PWC na aña 2015, y un ta un recapitulacion haci pa PWC di 13 diferente studio den aña 2016. Esun di 2016 Parlamento a haya. Pero esun di 2015 e minister no kier duna nos. El a bisa cu e no ta existi, y despues el a bisa cu e ta existi pero e no ta oficial.
Nos a haya si e conclusion di e studio di PWC di 2015, den letranan chikito di e rapport di 2016. Y den e documento di PWC di 2016 ta para riba pag 19 cu PWC a haci un otro studio na all-inclusive di Aruba (na aña 2015) y a yega na e conclusion: “it might be advisable to embrace the all-incusive concept”. No ta ami ta bisa esey, ta e rapport cu e minister a usa como base pa e ley aki ta bisa esey. PWC ta yega na e conclusion aki a mirando cu Aruba tin experiencia cu all-inclusive na Aruba. Tambe pasobra hopi turista ta scoge pa all-inclusive awendia, y mirando cu tin e posibilidad cu hotelnan all-inclusive di marca kier bin Aruba, nan ta recomenda pa Aruba brasa e modelo y continua cun’e. No ta ami ta bisa esey, ta e rapport cu Otmar Oduber a paga 250 mil dollar pe y cu Otmar Oduber ta uza como base di e ley. Y pesey nos kier haya e rapport completo pa sa a base di kico PWC ta yega na e conclusion aki. Principalmente pasobra ainda mi no ta compronde dicon e minister no kier duna nos y ta sigui gaña cu e no ta existi. Un cos si ta sigur, lesando e conclusion aki mi ta conclui cu e minister a tuma tur hende hasi: Raad van Advies, Banco Central y su fraccion den Parlamento, pasobra e rapport di PWC cu e ta tene scondi, no ta sostene e posicion di e minister. Esaki por trece cune cu un hues por bari e ley for di mesa facilmente.
Ta importante pa ATA tene na cuenta cu dentro di poco gobierno ta cambia, y e ora si nan mester produci e rapport ey. Y si resulta cu ATA a coopera cu Otmar Oduber pa manipula henter e sistema legislativo, esaki lo ta devastador pa ATA.
Un cos ta sigur, e rapport aki lo bin riba mesa ‘sooner or later’” lider di MEP Evelyn Wever-Croes a duna di conoce.