Cuido di salud di e cuidadano a bay atras considerablemente, y e confiansa den nos cuido di salud ta menos. Situacion a bay asina leu cu cuidadanonan mester a manifesta pa pidi atencion algun luna atras, pero ni esey a yuda. Nos institutonan cu mester brinda servicio di salud ya no por cu e demanda debi na crecemento di nos poblacion. E realidad cu nos ta bibando aden awor ta cu un pashent mester warda varios luna pa haya cita cu su specialista, y algun no ta logra warda asina tanto y ta perde e lucha cu nan malesa prome cu e dia di nan cita yega. Un pashent mester warda hopi tempo pa por haci un MRI, y mientras tanto si e tin un malesa, esaki ta sigui avansa, y talbes pa dia e haci e MRI, ya ta laat.
Hospital mester a cancela operacionnan pasobra no tabata tin material pa opera, y operacionnan di wowo a wordo posponi te cu otro aña.
“Pami esaki ta totalmente inaceptabel. Mi no por compronde con sr. Mike Eman por drumi trankil anochi sabiendo cu e ta causante di un problema serio den salubridad publico, anto riba dje sali y bisa cu e ta orguyoso! Y mientras cu minister Schwengle ta pleita cu tur hende, ta ofende pueblo di Savaneta, ta persigui esnan cu ta bende Oxi+, cuido di salud ta wordo neglisha.
Pa MEP no tin prijs riba salud di hende y sigur no riba bida di hende. Nos ta conciente cu un pais cu ta respeta su mes, mester brinda un cuido di salud digno na su cuidadanonan, y cu esey nos ta compromete: mehora e calidad di cuido pa un y tur. Pesey nos ta propone e siguiente solucionnan:
SOLUCION pa problemanan den cuido di salud:
• Mester bin mas dokter di cas y specialista pa cada ciudadano haya e oportunidad di un atencion medico specialisa y rapido, y mester mehora e comunicacion entre dokter y specialistanan na Aruba. Tambe soluciona e problema di nos studiantenan di medicina cu ta studia den regio cu nan diploma no ta wordo reconoci
• Mas Centro Medico y di Diagnostico riba nos isla pa duna asistencia medico inmediatamente, cuminsando cu upgrade Centro Medico San Nicolas y haci’e un hospital; riba termino largo mester tin un Centro Medico y di Diagnostico den cada districto, cu posibilidad di haci dialisis y asina trece e cuido medico mas cerca di e ser humano
• Soluciona e problema di tempo di espera pa cita cu specialista, pa haci test na hospital y pa resultado di testnan na laboratorio
• Restructura costo di cuido di salud y modifica e sistema di AZV, caminda ta necesario ta baha gasto, pero esaki no por afecta e calidad di cuido di salud di e ser humano y cambiando e enfasis na cuido di salud curativo pa cuido di salud preventivo
• Separa cuido di salud di adultonan mayor di cuido di salud general
Nos compromiso ta pa mehora calidad di cuido di salud, y riba salud di hende, ni riba bida di hende tin un prijs”, segun lider di MEP Evelyn Wever-Croes.