Evelyn Wever-Croes: Islanan BES ta pidi ayudo

0

Diahuebs 15 Juni, durante reunionnan den Eerste Kamer na Hulanda, tabatin un encuentro historico entre Parlamentonan di Aruba, Boneiro, Corsou, Sint Maarten, Saba, Sint Eustasius y Hulanda. Esaki tabata un sesion hopi interesante na unda e representantenan di Boneiro, Sint Eustasius y Saba a elabora riba nan dolornan despues di ta pertenece na e Islanan BES. Cada isla a haya e oportunidad pa trece padilanti unda nan ta para y kico ta e problemanan cu nan tin den e constelacion di BES. Lider di MEP, Evelyn Wever-Croes ta elabora mas riba esaki:

“Den linianan general, e islanan aki ta sinti cu nan a wordo neglisha y cu nan ta wordo dirigi pa ambtenaarnan Hulandes di Den Haag cu no ta comprende cultura y situacion di e islanan di Boneiro, Sint Eustasius y Saba. E islanan aki a pidi atencion di e Parlamentonan di Hulanda, Corsou, Sint Maarten y Aruba. Nan a pidi pa sostene nan den nan lucha pa nan por haya mas di bisa den nan propio pais y haya un poco mas autonomia.

Den nomber di Partido MEP, mi a probecha di e oportunidad pa urgi y enfatisa riba e Parlamentarionan Hulandes, pa loke sea nan dicidi, nunca tuma decisionnan sin consulta cu e pueblonan di Islanan BES. Ta facil pa dirigi e islanan aki desde Den Haag, sinembargo no por dicidi riba e futuro di e islanan aki sin consulta cu nan prome.

Ya caba algun di e islanan aki tabatin referendum riba status den Reino. Pero claramente no tin mucho atencion y respet ta wordo duna na e referendumnan aki. En todo caso, pa cualkier decision, mas ainda cu awor decisionnan importante ta bay wordo tuma den e constitucion Hulandes pa loke ta trata e tres islanan aki, mi a urgi nan pa nan no tuma decisionnan sin consulta cu e islanan aki prome”.

Sra Evelyn Wever-Croes ta termina bisando: “Na final di dia, Boneiro, Corsou, Sint Maarten, Saba, Sint Eustasius y Aruba, ta islanan cu tin lasonan historico y lasonan familiar hopi fuerte cu ta uni nos. Mi ta premira un futuro hopi briyante si nos logra traha mas cu otro y yuda otro. Compromiso di Partido MEP una bes cu nos ta den gobierno, ta pa estrecha laso cu e demas islanan pa hunto nos traha riba e problema y desafionan cu cada un ta enfrenta riba diferente tereno. Esaki ta inclui terenonan di siguridad, salud y enseñansa. Riba tereno di oportunidadnan y posibilidadnan economico y di turismo”.