AVP ta keda insisti pa NO baha e peso di belasting di pensionadonan. Nan a vota CONTRA e mocion den Parlamento y awor ainda ta sigui insisti pa pensionadonan keda cu e peso halto. Lider di MEP Evelyn Wever-Croes a defende e causa pa elimina e belasting riba pensioen di biehes, pero AVP a vota contra. AVP no por duna ningun argumento valido.
“Den e dianan aki mi ta bishita varios pensionado pa yuda nan cu nan formulario di belasting. Mi ta haciendo esaki algun aña caba, pasobra no ta tur pensionado por yega na Sede cerca nos of na departamento di impuesto. Mi ta bishita nan y duna nan e servicio di yena nan formulario y percura pa e wordo entrega na departamento di impuesto. Asina mi ta yuda unda cu mi por.
Mi ta lamenta cu tanto pensionado ta wordo molestia pa yena e formulario di inkomstenbelasting. Nan ta preocupa por nada, y esey no ta yuda na nan calidad di bida.
Pa nan ta dificil pa yena e formulario, y nan mester di ayudo. Y si nan no haya ayudo, y nan no yena e formulario, nan ta haya cobransanan halto y cu boet. Ademas ta hopi pensionado tin debenan bieu ainda pa paga, debi cu departamento di impuesto tin atrasonan grandi, mandando cantidad di cobransa pareu. Riba dje, e gran mayoria di e cobransanan a caduca caba, y si e pensionado no sa esey y e firma un areglo di pago, e mester paga e debe maske el a caduca, pasobra el a reconoce e debe. Pesey e categoria aki di pensionado mester di mas atencion, pa nan por keda trankil y pa nan no paga debenan cu nan no mester paga. Mi ta sintimi hopi bendiciona cu mi por yuda nan, y mi lo sigui yuda te na unda cu mi por. Na momento cu MEP ta den gobierno, nos lo baha e peso di belasting pasobra nos pensionandonan no por mas.
DICON AVP NO KIER DUNA E PENSIONADO E ALIVIO?
Locual mi no ta compronde ta dicon AVP no kier duna nos pensionadonan e alivio ey. AVP a purba defende e decision door di bisa cu bo no ta paga belasting caba riba pensioen di biehes. Ta bon pa mi corigi e mentira aki mesora. Mare tabata berdad cu bo no ta paga belasting riba pensioen di biehes. Pensioen di biehes ta cay bou di e entradanan menciona den artculo 7 di e ley di Inkomstenbelasting, y pues bo mester paga belasting riba dje. Pesey bo mester yena den bo formulario e pensioen cu bo ta ricibi na pregunta 14d “AOV-uitkering”. Y ta pesey nos pensionadonan mester bay SVB busca e resumen anual pa yena nan formulario cada aña. Ohala cu locual cu sr. Rasmijn a bisa den Parlamento tabata berdad, pasobra e ora e pensionadonan aki no tin mester di molestia nan curpa ta yena e formulario cada aña. Pero e berdad ta diferente.
E pensioen di biehes ta cay bou di e entradanan cu bo mester paga belasting riba dje.
Si e pensioen di biehes ta bo unico entrada, e tarifa di inkomstenbelasting ta 0, pero e tarifa di AZV si ta 10.5%.
Si un persona tin un entrada adicional, e ora e dos entradanan ey ta cumula, y e mester paga belasting riba e pensioen total, y e pensionado ta haya su mes cu cobransa di 500 florin of mas. Y e grupo aki ta mas cu mita di e pensionadonan.
Esey nos kier evita. Nos pensionadonan a traha duro henter nan bida, y nan a paga belasting caba. Nos pensionadonan merece un bida trankil. Dicon AVP no kier duna nan esaki? Maske AVP a vota contra e mocion, nos lo no give up. Nos ta mas determina cu nunca pa sigui lucha pa baha e peso di belasting di nos pensionadonan, cu AVP kier of lag’i kier”, lider di MEP Evelyn Wever-Croes a duna di conoce.