Dia 26 di November partido MEP ta recorda 30 aña di fayecimento di nos lider inmortal Betico Croes. No tin palabra pa describi e tristesa cu henter comunidad a pasa aden ora cu dia 26 di November 1986 e noticia lamentabel a yega for di Utrecht, Hulanda cu Betico Croes a fayece despues cu el a pasa casi 11 luna den coma, tanto na Aruba, Merca (Miami y Chicago) y Hulanda (Maastricht y Utrecht).
Durante henter su carera politico Betico Croes a hiba un lucha tenas pa saca Aruba for di e constelacion Antiano y su ideal di mas grandi tabata di mira e pueblo Arubano dirigi su propio destino. El’a sa di logra realisa e deseo di pueblo di Aruba atrabes di un UNION fuerte cu el a sa di crea den pueblo.
Awe e ta e politico cu mas ta inspira otro politiconan. E ehempel cu tur lider kier sigui.
“Nos ta para keto riba e fecha aki cada aña, y e aña aki mas ainda. Ta un fecha riba cual nos tur ta reflexiona riba su logro y su sacrificionan. Su palabranan legendario “si un dia mi cay na caminda, gara e bandera y sigui cu e lucha”, ta inspita mi tur dia den politica. Ta locual cu Nel Oduber a haci pa 25 aña despues di fayecimento di Betico Croes, y ta locual cu ami a haci 5 aña pasa.
Den nomber di partido MEP mi ta invita henter comunidad Arubano pa asisti diasabra 26 November 6’or atardi pa un ofrenda floral na graf di Betico Croes y 7’or pa un Santo Sacrificio di Misa na Iglesia Inmaculada Concepcion na Santa Cruz”, lider di MEP a finalisa bisando.